城中鏡：至潮中環
本港有超過一百二十萬潮籍人士，但除咗潮州打冷受歡迎外，仲有好多其他潮州特色美食同文化，都一樣值得大家保留同欣賞。香港潮屬社團總會（總會）將喺十月八日至十二日，假中環遮打花園舉辦「香港潮州節」，屆時現場會布置成潮州傳統大宅，等大家可以恍如置身潮州，一邊品嘗潮式美食，一邊欣賞罕有嘅潮州表演。主席陳幼南就話喺眾多潮州美食中，獅頭鵝可以話冇得輸，好食又入味。
鄭敬凱（右）同陳光明話活動期間，會有功夫茶茶杯派發。
藍鴻震（左）、張成雄（中）同許學之大歎潮州家鄉美食。
陳幼南（左）話可以同「舞鵝」合照，陳香蓮就提醒大家自拍完記得參加比賽。
一班潮州「家己冷」尋日聚集喺上環總會宣布「潮州節」內容。陳幼南話今次唔會有舞龍舞獅，但就有「舞鵝」即潮州雙鵝舞同「鯉魚舞」，仲有潮州布馬舞同潮劇表演等，部分更加係連佢都未睇過。佢笑言到時隻「鵝」舞完後，會好似主題公園啲卡通人物咁，會同市民合照。
功夫茶杯 先到先得
總會榮譽顧問藍鴻震、常務副主席張成雄同永遠名譽主席許學之，則於現場率先大歎家鄉小食，包括手打墨丸同魚蛋、綠豆餅同花生糖等。常務會董兼活動總統籌鄭敬凱話活動期間，將會有十二個美食攤位，市民可一嘗多種潮汕小食如滷鵝、熏鴨、菜頭粿、香煎白飯桃等滋味，又會以先到先得形式，派發二千隻功夫茶杯，食飽後可以斟杯功夫茶消滯。
見一班前輩食得咁開心，會董陳光明及名譽會董陳香蓮就提醒大家，到時記得於會場自拍一張照片，參與「潮Selfie」自拍比賽，唔少會內前輩最近都因此潮學點用社交網絡，但張成雄笑言，唔習慣舉高手攞角度自拍，都係影吓乖孫嘅可愛樣最開心。
