回收場火災頻頻 懶監管亂象多多

回收場又火警，係吖，係又吖！屯門龍鼓上灘一個塑膠回收場前晚發生三級大火，火乘風勢，波及毗鄰另一個回收場，當局出動二十九架消防車、一百三十名消防員撲救，八小時後先至救熄，好彩火場附近冇民居咋。

睇怕冇人數得出今次已經係第幾次回收場火警嘞，遠嘅唔講，最近短短三個月已有幾單：九月份坪輋一個電腦廢料回收場三級火警、十月份元朗一間油渣回收場漏電起火、十月初流浮山塑膠回收場大火、兩星期前流浮山又一個廢料回收場起火……都咪話唔頻密。唔好以為回收場火警造成嘅損失及破壞有限吖，塑膠又好，舊電器又好，其他電子產品又好，一燒着就會釋出大量有毒濃煙，對空氣及環境嘅破壞隨時仲大過停車唔熄匙。

點解回收場咁易發生火警？講嚟講去又係港府監管不力咯。當局口口聲聲重視環保及回收業，其實除咗識收錢之外，乜都唔識做。咁多年來，環保政策亂七八糟，回收業既無規劃又無設施配合，連合適嘅地方都唔夠，只能自生自滅，又點可能唔烏煙瘴氣吖。以今次出事嘅回收場為例，冇水又冇喉，消防員到場後居然要接駁八百米喉抽海水灌救，都唔知幾狼狽。叮，回收場存放咁多易燃物品，消防設備百冇，即係靠害啫！

最搞笑嘅係，前朝貪曾政府吹水唔抹嘴，將環保列入所謂六大優勢產業，當年仲撥款三億元喺屯門興建環保園添。點知環保園一波三折，足足延誤四年至開始運作，而且醜聞多多，結果唔少回收公司一樣要去新界租農地經營。環保園搞嚟搞去得個吉，連審計署都睇唔過眼，發表報告批評環保署管理不善，浪費公帑。

所以話，港產官僚講就天下無敵，做就無心無力。佢哋淨係識得話堆填區就快爆棚，有需要加強源頭減廢，做好廢物回收，點知到頭來乜都唔做，連配合回收業發展嘅政策都冇，試問又點樣做好回收呢？講真吖，環保係大勢所趨，如果做好消防及衞生設施，回收業大有可為o架。正如業界人士話齋，當局應該推出發牌制度，幫助業界去蕪存菁。可惜港產官僚左耳入，右耳出，所謂源頭減廢，根本就係大隻講！

回收場亂象叢生，證明港府環保失敗。好簡單，回收業不成氣候，就算市民有心減少垃圾，都唔知攞去邊度回收喇，叮！