高空工作變高兇 監管甩漏害死人

政府為咗鼓勵後生仔投身建造行業，宣傳廣告話「香港地，有排起」喎，其實計太一叮話齋，係「有排跌」就真。呢嗱，又有建築工人跌到血濺工地，一名尼泊爾籍地盤工人高空工作期間，懷疑棚架折斷，由十樓直墮一樓天井「鋼筋樁」，雖然有竹棚卸力執番條命，但慘遭兩支鋼筋貫穿右臀至右腋，講起都恐怖。

工業事故搞到血肉模糊，無錯令人不忍卒睹，但點解話有排跌呢？係咁嘅，高空工業安全問題未見改善甚至惡化，工友危機處處，慘劇絕對有可能不斷重演。

嗱，根據工業傷亡權益會資料，今年截至十二月十四日，總共發生咗二十宗高處或離地工作致命事故，重傷亦有八宗，其中大部分個案都發生喺地盤。事實證明，安全監管工作嚴重甩漏，根本虛有其表得個殼。宣傳口號講就講得動聽嘞，乜嘢「職安為己任，顧己又及人」，乜嘢「安全做工作，唔使搵命博」，原來全部都係空口講白話，叮！

慘劇一宗都嫌多，更何況一年死咗二十人？當局究竟有無認真改善職安問題o架？有無嚴格監管o架？唔通勞工官僚返工淨係坐喺度歎冷氣嘅？工業傷亡權益會係咁講嘅，高空工作事故頻生，好多時因為僱主未有向工友提供合適防護裝備，又或者工友不正確使用裝備所致，而現時對違例僱主判罰太輕，就係僱主輕視職安問題嘅死因。

真相大白！建築工人經常一失足成千古恨，傷亡慘重嘅主要原因就係港產官僚無做好佢哋份工。一來無好好監管僱主，二來無好好教育工友，官老爺長期瞌眼瞓，高空工作變高兇工作，你話嘞，建築工人係咪有排跌吖？

虧當局仲夠膽話香港有排起，家陣工業事故頻生，建築工人隨時跌到非死即傷，搵鬼嚟起咩？話時話，點解建造業總工會早前公布十幾個工種工人獲逆市大幅加薪呀？咪因為行內人手短缺囉。點解人手短缺呀？咪因為一來工種性質辛苦，二來工種性質危險囉。搵錢人人都想，但係無人會搵命博，如果工業安全唔改善，點樣吸引後生仔入行呀？如果建造業青黃不接人力緊絀，又搵邊個打造呢條香港經濟支柱呀？

工業安全關乎人命，亦關乎經濟長遠發展，官老爺唔該做好你哋份工，再有工友跌到血肉模糊，做鬼都唔放過你哋，叮！