官場小學雞鬥氣 局長唔得掂牙煙

細路仔嗌交鬥氣嘅十大金句之一就係：「我唔想做o架，你哋叫我做咋！」嗱，踢波守龍門被人射到褲穿窿，做露營大隊長唔記得帶帳篷，身為班長日日遲大到，賴皮小學雞想逃避責任，呢句通常成為卸膊藉口。

呢嗱，又有人搵呢句做擋箭牌嘞，不過今次口不擇言嘅小學雞，「笨」唔係腦囟未生埋嘅細路仔，而係肩負作育英才神聖任務嘅教育局局長吳克儉。

話說融樂會炮轟教育局對少數族裔學生支援不力又欠缺承擔，本來呢，教育局施政甩漏頻頻失職都唔係新聞咯，最離譜嘅係根據融樂會引述，吳克儉日前喺閉門會議居然爆出一句相當晦氣嘅說話：「我無諗過可以做教育局局長！」

似唔似細路仔嗌交鬥氣呀？似唔似小學雞搵藉口卸膊呀？人哋批評你辦事不力，做教育大隊長不稱職，你就反寸一句「無諗過可以做教育局局長」，咁同守龍不力小霸王反咬隊友：「我唔想做o架，你哋叫我做咋！」有乜分別？至少，吳克儉呢番鬥氣說話，畀外界觀感就似足一隻縮骨官場小學雞囉，叮！

為官從政係一件莊嚴肅穆嘅事情，唔同細路仔玩泥沙，無論閣下有無諗過做局長，接受得任命就要承擔責任，身先士卒勇闖前線衝鋒陷陣。尤其香港經歷曾蔭權「痛心特首」嘅禍港七年之後，家陣烏煙瘴氣，百廢待興，如果做官嘅個個都庸碌畏縮，咁咪應驗吳克儉嘅花名「唔得掂」？納稅人每年用幾千萬請你哋返嚟，唔係畀你哋學點樣卸膊o架！

所以話啫，唔得掂……唔係，吳克儉呢句「我無諗過可以做教育局局長」，真心話又好，晦氣話都好，係極之不負責任嘅搪塞藉口，應該列入港官十大捉蟲金句以儆效尤。之不過諗深一層，都唔能夠怪晒吳克儉嘅，新班子拉雜成軍濫竽充數，一係施政守龍甩甩漏漏，畀人射門射到褲穿窿，一係新官上任無帶遮醜帳篷，搞到舊帳醜聞大白天下醜態百出，吳克儉可能只係縮骨官場小學雞其中一隻嚟o架咋。香港靠呢班官僚把關施政，咪話少數族裔學生覺得唔多掂，全港市民都覺得牙煙啦。

總之，當官就要上前線，局長縮骨唔得掂。吳克儉又好，其他問責官員又好，快快奮發圖強改善施政，唔好再講縮骨卸膊嘅晦氣說話教壞細路，叮！