致癌毒油運內地 己所不欲施於人

孔子有云，己所不欲，勿施於人；俗語就話，泥水佬開門口，過得自己過得人。兩種講法唔同，但意思就一樣：做人處事要將心比心，唔好淨係識得顧自己，更加唔好損人不利己。

講緊嘅咪就係最近搞到香港人心惶惶嘅毒油風波囉。食安中心早前抽檢發現多款花生油含有致癌物質，於是要求供應商回收，點知收極都係一半，其餘早就流出市面，可能已經進入尋常百姓肚。咁都未算，更離譜嘅係，入口商唔係將回收嘅毒油銷毀，而係運番上去內地，你話喇，呢啲毒油究竟用嚟作乜呢？

叮，仲使問阿桂咩，內地官商勾結，乜都做得出，毒油運番上去，隨時食得唔好嘥。換句話講，香港唔賣內地賣，港人唔食同胞食，擺明靠害啫。食物及衞生局局長高永文話喎，已經通知內地執法單位，就算呢批毒油運咗上去，相信有關部門亦會採取措施。

喂，唔好咁天真喇，官僚靠得住，豬乸會上樹，如果內地可以採取措施把好關，黑心食品就唔會賣通街，中國人就唔會被人叫「東亞病夫」喇。

三歲細路仔都知，任何地方發現問題食品，除咗要盡快回收同追查源頭，仲要監督供應商將問題食品銷毀，以絕後患。今次港府唔只追查唔到毒油嘅源頭，而且任由入口商將毒油回流內地，隨時毒害同胞，簡直係雙重失職。

舉個例吖，本港過去多次爆發禽流感，當局都識得大開殺戒，寧殺錯不放過，活雞一隻不留，統統毀滅。試諗下，如果當局容許入口商將禽流雞運回內地，內地同胞會唔會接受吖？點解禽流雞要毀滅，而毒油就毋須銷毀呢？

沒有最恐怖，只有更恐怖，內地黑心食品層出不窮，幾乎無物不毒，無食不憂，最近仲揭發用二十種抗生素及激素催生嘅「速成雞」，連跨國連鎖食肆都中招，搞到同胞冇啖好食。將心比心，如果內地將呢啲黑心食品推晒畀本港，港人會點諗吖？港府又會有咩反應吖？

所以話，官僚後知後覺唔係最可怕，最可怕係不負責任。港產官僚敷衍塞責，得過且過，對食品安全把關不嚴，唔止禍害港人，而且禍害同胞，叮！