強積金廢到無倫 小修補無濟於事

強積金花名叫「強迫金」，真係實至名歸。收費高到無人有，回報低到無朋友，打工仔對住呢個擺明搵笨嘅金融天仙局，居然反抗無從，脫身無門。個個月無奈奉上血汗錢，何止係強迫，簡直係強姦，霸王硬供款形同強姦全港打工仔荷包。

嗱，強積金強迫打工仔被搵笨，唔只普羅市民火滾，監管機構積金局一樣忍無可忍，發表報告建議大刀闊斧改革，以改善「高收費、低回報」問題。即係咁，積金局終於覺今是而昨非，向強積金制度開刀，係就係後知後覺o架嘞，遲到好過無到啦。

咁積金局有乜補鑊計仔呢？簡單講，就係逼基金公司降低收費，包括訂立收費上限，引入非牟利受託人，要求基金公司提供低收費基金選擇，同埋鼓勵打工仔整合帳戶等等。如果真係改革，估計到一八年基金開支比率可以降低六十個點子，令淨回報上升咁話。

睇完積金局嘅獻計，各位打工仔點睇呢？太一叮就諗到八個字：捨本逐末，作用有限。強積金點解收費貴到全球首屈一指呀？就係基金公司呢隻食肉獸貪得無厭吖嘛，積金局唔對症下藥打怪獸，無論幾多措施，結果都係成效有限咋。

大家可能話，積金局唔係建議引入非牟利受託人咩？係就係，不過不切實際呢，正如立法會議員話齋，由工會或者社企擔當受託人，由於缺乏經驗及財力，根本難以同基金公司競爭，到頭來咪又係嘥氣！

講到尾，改革強積金嘅最徹底方法，就係由當局擔任中央受託人，咁打工仔至可以安枕無憂。港府管理兩萬億元外匯基金都得咯，唔通管唔掂四千億元強積金？積金局報告都識講啦，本港強積金行政開支全球最貴，高達百分之零點七五，每年七十億元流入基金經理褲袋，咁同利益輸送有乜分別？前特首曾蔭權爵士就話醉心搞官商勾結啫，新政府唔需要再向金融霸權傾斜喎。

咁講啦，強積金收費高昂，早就人所共誅，港府點都要諗計撳低佢o架嘞。不過，對一味吸食民脂民膏嘅超級食肉獸一樣唔可以手軟，應該盡早將佢哋降伏。特首梁振英成日話穩中求變，適度有為，新政府係時候為打工仔有所承擔啦，如果唔係，強積金變成強積民怨，咁新政府就自己搵自己笨o架嘞，叮！