《好報》魅力沒法擋 牛鬼蛇神怎躲藏

《好報》魅力沒法擋，繼上周創刊號旗開得勝，尋日出版嘅第二期再創佳績，幾十萬份一樣手快有手慢冇，眨下眼就派晒。嗱，今次又來遲一步嘅讀者，下周五真係要請早喇。

叫得《好報》，梗係人人啱睇，個個讚好o架喇。捧場客唔只跨越界別，而且跨越年齡，有政商名人，有普羅市民，有中老年人，亦有後生仔女，無他嘅，好人有好報，《好報》內容夠新夠猛夠堅夠辣夠八卦夠刺激，唔睇就走寶喇。正如前商務及發展局局長馬時亨話齋，《好報》有齊飲食、購物、娛樂、中外新聞，內容輕鬆有趣，男女皆宜。

講到猛料堅料，今期《好報》獨家專訪成龍，大爆呢位國際巨星鮮為人知嘅一面，令人津津樂道，唔怪得讀者大讚「極之吸引眼球」。除此之外，《好報》踢爆淫賤黎出售台灣資產救亡嘅驚人內幕，題材應景，內容精彩，資料詳盡，分析透徹，真係愈睇愈過癮。呢，淨係「賣得到未必好，賣唔到渣都冇」個題目已經夠晒煞食，簡直係一針見血，篤爆壹淫媒瀕臨破產嘅處境。

話說壹淫媒流血不止，過去半年勁蝕逾九點三億港元，加上債台高築，銀行貸款連上月嘅融資高達十點四億元，再唔止血，隨時一命嗚呼都似。面對窮途末路，壹淫媒焗住以一百七十五億元新台幣出售台灣資產救亡，點知簽約前仲畀買家劏多一刀，壓價二十五億元新台幣，償還債務及其他開支七除八扣之後，實際落袋得雞碎咁多，究竟止唔止到血，實在令人懷疑。更弊嘅係，今次交易仲有好多關要過，分分鐘臨尾香，見財化水得個吉。

好多人諗極都唔明，淫賤黎出售台灣資產止血，但簽約地點既唔係台灣，亦唔係香港，而係澳門，究竟點解？《好報》得到權威人士爆料，指買賣雙方選擇喺澳門簽約，可以冚住好多唔見得光嘅內幕，事關買家背後可能另有金主，而且唔排除涉及內地控制嘅資金。所以話，淫賤黎反共不遺餘力，自稱「民主鬥士」，查實不過係掛羊頭賣狗肉咋，佢真正愛嘅唔係「民主」，而係銀紙吖。正如《好報》話齋，「賺錢時反共，賠錢時求共」，呢個咪就係淫賤黎嘅真面目囉。話時話，都係多得北大人敵友不分，反共有獎，佢先至可以待價而沽啫。

總而言之，好人好事有好報，小人唔好當冇到。《好報》一定會再接再厲，隨時為大家送上內幕猛料。講到呢度，太一叮再次提醒大家，《好報》下期加料炮製，可能一分為二，千祈咪走寶吖！