入波男辛格拿活塞新Icon

花式投籃「辛」人王誕生!今季活塞繼續扮演弱旅角色,不過陣中新秀辛格拿就憑藉獨門花式投籃技藝爆紅,無論撞柱、撞車抑或腳踢,辛格拿的高難度投籃統統應聲入網,加上籃球IQ高又好腳頭,難怪活塞決定捧佢做新招牌,將辛格拿打造成「汽車之城」Icon!

短片獲過百萬點擊率

爸爸Ed打四分衞、媽媽Kris則是籃球員,來自體育世家的辛格拿,自杜克大學時期已有鋪花式投籃癮,兩條精心炮製的投籃短片都在youtube獲得過百萬點擊率,星味、戰績欠奉的活塞當然食住上,球會公關部早前就推出一條辛格拿短片,幫這位「The Bucket Man(入波男)」谷人氣。

之所以被美媒譽為「入波男」,皆因辛格拿無論用腳踢、後手投射、借用車頭擋風玻璃反彈籃球都一樣射親都入,神乎奇技片段熱爆籃壇,人氣勁升。有見及此,活塞已有一連串大計捧紅辛格拿,近期更頻頻派他出席球會公開活動,希望自比立斯帶隊奪得04年總冠軍後,打造底特律體壇新Icon。

腳頭好打波秘訣食腦

場外花拳繡腿,場內就實而不華。雖然辛格拿的9.9分及3.5個籃板場均數據並不標青,但係好得隊友歡心,韋爾拜林就稱:「辛格拿喺場上不斷奔跑拉開對方球員,帶挈我哋有空位剷籃,呢啲嘢唔會喺數據上面見得到,但籃球IQ高嘅球員都會認同辛格拿係好嘢!」

自從上月中躋身正選行列之後,辛格拿協助開季8連敗的活塞錄得6勝6負成績,勤力加上好腳頭定會獲教練法蘭克重用。去季停擺期間到西班牙搵食的辛格拿稱:「一場波攞幾多分唔重要,最重要係你識唔識點打場波,西班牙聯賽嘅球員從來唔係靠大隻同速度,佢哋打波係食腦,喺西班牙起步令我獲益良多。」辛格拿令活塞重上正軌,明早造訪有艾榮及維特斯倦勤的騎士可秤先,受讓1.5分要下盤。

辛格拿 Kyle Singler

綽號:The Bucket Man

年齡:24歲

身高:6呎8吋

體重:104公斤

選秀排位:33位(2011年)

所屬球隊:活塞

位置:後衞/前鋒

曾効力球隊:阿利坎特、皇家馬德里

威水史:NCAA冠軍(2010年)、NCAA最佳表現球員(2010年)、西班牙國王盃(2012年)