的士集體死火 隨時車毀人亡

潮流興講「語言藝術」，計太一叮話齋，中華文化源遠流長，語言藝術由來已久，尤其係華洋雜處嘅香港地，升斗市民活用中英兩文，創出唔少令人啜核嘅地踎詞彙。用來形容辦事不力嘅「賓士迫力」（Benz Brake），就係民間語言藝術嘅典型例子。

香港廢人特別多，賓士迫力時時見，最新例句包括：官府保育何東花園鎩羽而還，賓士迫力咯！政府山西座話拆話拆又唔拆，賓士迫力咯！幾百架的士齊齊死火，賓士迫力咯！

究竟的士死火同賓士迫力有咩關係？且聽太一叮從頭道來。話說二○○九年底，全港二千架的士集體死火，政府機電工程署事後介入調查，查來查去都查唔出原因，循例交份報告就草草了事。事隔三年，歷史重演，幾百架的士近日行行下忽然死火，嚴重者一日死火五十幾次，搞到司機大佬人人自危，惶惶不可終日啊慘。

對於今次集體死火事件，有人話石油氣有雜質，有人歸咎天氣轉涼，有人懷疑車輛老化……不管原因係點，有樣嘢可以肯定，的士死火，後果嚴重。就講今年九月中咋嘛，一架的士喺大圍徑口路落斜時突然死火，迫力系統同時失靈，成架車沿斜路俯衝二十幾米，如果唔係司機經驗老到，喺千鈞一髮之際將架車挨埋路邊鐵欄借力停低，隨時應咗特首選舉失敗者唐英年金句，車毀人亡都有之，叮！

既然的士死火後果咁嚴重，機電署梗係要立即出動，查明原因，預防出事啦。死得佢呀，機電署竟然話喎，該署上月先至抽驗十七個石油氣樣本，結果全部合格。點知言猶在耳，即被加德士冚咗一巴，承認旗下車用石油氣含有過量硫磺化合物，需要全線停售。好明顯，石油氣「全部合格」係假，機電署嘅抽驗同監管工作全線肥佬至真！

叮你個鎯鎯呀，幾百架的士集體死火，絕唔可能純屬巧合，機電署上次調查不了了之，賓士迫力已被紀錄在案，再唔痛定思痛把好關，萬一將來搞出人命，冇人孭得起o架，叮！

的士又爆死火潮，賓士迫力心慌慌。古人都有話啦，一室不掃，何以掃天下？如果港府連的士死火咁細嘅事都處理唔好，點可能「穩中求變，適度有為」吖。老實講句，再咁賓士迫力落去，唔止的士死火，施政都好易死火o架咋。