快樂周五又來到 好人好事有《好報》

好人有好報，好報繼續來。外國人講「Thank God It's Friday」，多謝上帝，又到星期五；而香港人就話「Happy Weekend」，周末快樂。呢，《好報》今日又同大家快樂見面喇，千祈唔好錯過吖！

太一叮快樂之餘，喺度先同大家耍個冧講聲對唔住。上周五《好報》創刊號強勢登場，市民反應熱烈超乎想像，港九新界一百幾個派發點眨下眼就派晒幾十萬份，好多讀者來遲一步，失望而回，真係唔好意思。為免再次向隅，今日早啲喇！

正所謂，莫道君行早，更有早行人，《好報》咁搶手，隨時手快有手慢冇。大家都知喇，有啲免費報粗製濫造，派都冇人要，唯一貢獻就係畀公公婆婆成疊當廢紙攞去回收，而《好報》重質重量，一紙風行，絕對供不應求o架。當然，就算你錯過免費派發，都唔使失望嘅，買份《太陽報》咪得囉，《好報》隨報附送，買一送一，雙重享受，夠晒超值。

講到超值，《好報》猛料夠新夠堅夠激，實真確，冇老作，每個星期五陪伴大家，確係一件賞心樂事。先有《東方》，後有《太陽》，今有《好報》，《好報》秉承東方報業集團宗旨，精益求精，好料猛料源源不絕，潮人潮事期期新鮮，今期內容絕對比上期更豐富，更精彩。講到呢度，太一叮不妨透露少少秘密，《好報》下期加料炮製，可能一分為二，以饗讀者，而以後每個星期仲可能出夠兩期添，值得大家期待o架。

總而言之，好人好事有好報，小人唔好當冇到。《好報》橫空出世，對讀者肯定係好消息，但對牛鬼蛇神咯喎，就一定係壞消息。家陣香江妖孽為患，社會烏煙瘴氣，東方報業弘揚正氣，掃除邪氣，邊個做咗虧心事，邊個閃閃縮縮，實逃唔過《好報》嘅窮追猛打。嗱，上周睇過創刊號嘅讀者一定深有同感，名人明星內幕秘聞，盡在《好報》，所謂「好來好去有好報，偷偷摸摸現眼報」，就係咁解喇。

有麝自然香，《好報》人人讚好，除咗要多謝讀者捧場，廣告商醒目識貨，把握先機，更加抵讚。講到底，成功唔係靠運氣，而係靠眼光，廣告商觸覺敏銳，快人一步，自然生意興隆，財源廣進喇。

正如太一叮話齋，東方紅，太陽升，好報來。各位識貨之人絕對可以放心，你哋嘅支持就係最大嘅動力，《好報》一定加倍努力，再接再厲，務求做到節節領先，期期進步，好上加好。《好報》一出，誰與爭鋒，風景這邊獨好！