官府厚待曾朋友 處理僭建彈弓手

「僭建」係本港近排出現頻率最高嘅詞彙,簡直係鋪天蓋地,無處不在,想耳根清淨都幾難。

講到僭建,各位一定記得「曾朋友僭建黨」,前特首曾蔭權爵士其身不正,半山「祖屋」被揭發違例圍封露台,手下高官有樣學樣,卒之掀起一場席捲政壇嘅「僭建風暴」。勢估唔到,煲呔曾落台將近四個月,「曾朋友僭建黨」乜事都冇,佢哋嘅僭建物依家仲係原封不動。

呢嗱,前政務司司長唐英年九龍塘大宅年初被揭「掘深咗」,僭建面積二千四百幾呎嘅超豪「地下王宮」,引起全城嘩然,連廉政公署都要介入調查。點知時隔九個月,本報記者跟蹤調查發現,唐宅一切照舊,「地下王宮」仍然存在。

咁就奇嘞,屋宇署應該五月底完成調查報告,而廉署亦調查咗幾個月,點解兩個部門都冇下文,好似完全冇事發生一樣,到底搞邊科?

無獨有偶,前食物及衞生局局長周一嶽位於港島加列山道嘅豪宅五月中被本報踢爆違規用玻璃板封咗個露台,屋宇署去信要求一個月內拆除僭建物,結果又係得個講字,僭建物至今原封不動,絲毫無損。周一嶽回應記者質疑時仲鬼咁滋油淡定,聲稱已經交畀專業人士處理喎,你信唔信吖!

高官僭建搞到滿城風雨,事過境遷居然冇咗件事,唐唐玩拖字訣,周一嶽耍太極,完全當法例冇到。屋宇署執法放軟手腳,雷聲大雨點小,唔通真係前朝高官有餘威,執法亦要忌三分?叮!

屋宇署係咁講嘅,唐唐已經委託專業人士提交補救工程建議書,會跟進有關事宜,又話根據一貫處理程序,唔適宜透露個案細節喎。至於周一嶽家居嘅僭建物,屋宇署就承認曾要求限期處理,未執法係因為需要時間「了解」同「研究」補救工程建議書。

叮!唔使打官腔喇,唐英年地下王宮「未郁過」,周一嶽僭建露台「研究緊」,屋宇署噏咁多廢話無非係為前朝高官護短啫。呢,學者宋立功就講得啱嘞,涉及僭建人士係前朝問責官員,屋宇署淨係話個案正在處理,至於幾時糾正就冇晒下文,拖得就拖,市民又點會收貨吖。署方應該加緊跟進,否則會令人覺得「畀面前朝高官」,影響政府威信。

話時話,當局玩包庇,執法官民有別,仲邊有威信可言吖。僭建物之所以氾濫成災,皆因貪曾政府長期唔執法,依家想撥亂反正,睇怕都幾難咯,叮!

第一手消息請下載on.cc東方互動iPhone/iPad/Android/Windows Phone Apps