《好報》強勢登場 讀者喜氣洋洋

好嘢！萬眾期待嘅《好報》今日強勢登場，讀者有福喇！太一叮再次提醒大家，逢周五出版嘅《好報》，除咗隨《太陽報》附送，仲喺港九新界各區免費派發，派發地點多達百幾個，梗有一個喺左近，千祈咪錯過吖！

正所謂，太陽底下無新事，《好報》底下有好料，呢份由東方報業集團精心炮製嘅雜誌式報章，猛料勁料如雲，潮人潮事不絕，絕對唔係其他免費報可以相提並論。呢，最新最堅嘅政商名人動向消息、最八最爆嘅藝人明星內幕秘聞、最潮最型嘅消閒娛樂介紹、最齊最熱嘅天下奇聞趣事……內容豐富，包羅萬有，係名副其實嘅好猛料、好熱鬧、好八卦、好鬼盞、好鬼索嘅消閒娛樂資訊大餐，值得大家慢慢欣賞。

東方紅，太陽升，《好報》橫空出世，除咗賦予狗仔爆料文化全新定義，亦打破免費報死氣沉沉嘅悶局，為本港傳媒揭開新一頁。係人都知，一般免費報內容粗製濫造，淡而無味，同飲水喉水無乜分別嘅咋，相比之下，內容精彩嘅《好報》簡直就係一杯令人回味無窮嘅香濃咖啡，愈嗒愈正，令人心曠神怡。

即係咁，善有善報，惡有惡報，《好報》面世對讀者嚟講係好消息，但壞人睇怕就有得震冇得瞓喇，點解？《好報》嘅最大特色就係揭秘爆料，以東方報業嘅金漆招牌，加上龐大嘅編採隊伍，專業嘅辦報精神，邊個權貴做咗虧心事，邊啲醜聞唔見得光，喺《好報》窮追猛打之下，統統無所遁形。嗱，相信大家都見識過東方報業點樣踢爆曾蔭權爵士「貪遍省港澳，歎盡海陸空」嘅醜聞，《好報》秉承正義傳媒嘅宗旨，為民喉舌，懲惡揚善，牛鬼蛇神唔驚就假。

所以話，東方出品，必屬佳品，《好報》為香港注入正能量，為社會掃除害人蟲，又點只狗仔文化咁簡單。尤其係香港家陣黑白顛倒，妖孽為患，烏煙瘴氣，七國咁亂，港人對無日無之嘅政治爭拗早已厭倦，《好報》就好似一股清流咁，必定可以令人耳目一新。總而言之，睇《太陽》得《好報》，揭內幕有料到，相信讀者對「正義狗仔隊」一定充滿信心，對《好報》一定充滿期待。

呢嗱，期待嘅日子終於到嘞，如果你今日想先睹為快，旺角及銅鑼灣等旺區凌晨兩點左右就有《太陽報》賣嘅喇，買《太陽》送《好報》，好上加好。當然，你亦可以去免費派發地點攞番份，不過要記住，手快有，手慢冇吖！