新沙士病例急增 嚴把關咪瞌眼瞓

弊！弊！弊！舊沙士走咗，新沙士又嚟。中東地區爆發俗稱「新沙士」嘅新型冠狀病毒，確診個案忽然急增，至今已經奪去兩條人命，你都咪話唔驚！

世界衞生組織前日再收到四宗新型冠狀病毒感染個案，令確診個案增加到六宗，死亡個案增加到兩宗，四宗新增個案分別來自卡塔爾同沙特阿拉伯，當中兩宗來自同一個家庭。照咁睇嚟，唔能夠排除人傳人嘅可能性。

新沙士病毒來勢洶洶，世衞不敢怠慢，呼籲所有成員國嚴陣以待，考慮為所有感染原因不明嘅病人測試新型冠狀病毒。被譽為「沙士英雄」嘅港大微生物學系教授袁國勇加多兩錢肉緊，提醒目前感染新沙士嘅六名病人已經有兩人死亡，死亡率高達三分之一，顯示病毒嘅嚴重程度同禽流感差唔多，港府應該做好邊境申報，加強監察入境旅客。

太一叮唔係醫學專家，但根據常識推論，禽流感嘅死亡率高過沙士，而新沙士嘅死亡率又同禽流感差唔多，即係話，新沙士仲毒過舊沙士，殺傷力絕對不容忽視。見過鬼怕黑，萬一新沙士變種人傳人，大大增加傳播風險，喺全球一體化嘅今日，攻陷香港可能只係轉眼間嘅事。

更加得人驚嘅係，今次呢隻新沙士疫魔十分蠱惑，先係九月底爆發兩宗個案，事隔兩個月，大家都以為平安無事啦，佢又失驚無神突襲。病例斷斷續續，容易令人放鬆警惕，一個唔小心隨時畀佢乘虛而入，疫症大爆發都有之。

所以醫生提醒大家，預防疾病應該由生活做起，時時提高衞生意識，經常洗手，外遊時千祈唔好接觸野生動物或家禽，一旦出現發燒感冒徵狀，就要即刻戴上口罩，遠離人群同睇醫生。

不過咁，預防疫症嘅第一道關口始終係政府。○三年沙士搞到香港雞毛鴨血，正正係因為港產官僚既遲鈍，又反智，付出二百九十九條人命嘅慘重代價。家陣新科食衞局局長高永文話就話會加強監察，全面防範，但究竟做唔做到，仲要睇過至知。

一句到尾，新沙士病例急增，嚴把關咪瞌眼瞓。病毒無疆界，香港又係旅遊城市，容乜易畀病毒入侵吖，唔該有關官員打醒十二分精神，多管齊下預防疫症，千祈咪畀沙士慘劇重演啊，叮！