毒油未除毒肉來 食品安全幾成災

一波未平一波又起，致癌食油仲未搵出供應源頭，毒牛肉毒羊肉又殺埋身，咁搞法，港人遲早冇啖好食。

嗱，致癌食油大家啱啱見識過，就係近日鬧到滿城風雨嘅苯並（a）芘超標花生油，咁毒牛肉毒羊肉又係乜呢？係咁嘅，食物安全中心喺市面抽查咗一百八十個鮮肉樣本，發現其中六個鮮牛肉同一個鮮羊肉樣本含有化學物質二氧化硫。你知啦，二氧化硫有損人體健康，毒害同致癌食油有得揮，本港法例早就禁止喺肉類中使用，點解有人明知故犯呢？

所以話，民以食為天呢句話已經不合時宜，今日係民以食為憂，官僚把關不力，有毒食物長驅直入，市民唔驚就假。呢，就講致癌食油單嘢吖，當局查咗成個星期嘞，至今仲係一頭霧水，供應源頭喺邊度，分銷情況係點樣，問題存在咗幾耐，全部矇查查。而問題食油供應商就話，佢哋只係負責包裝，大罐改細罐，與致癌食油無關喎。唉，當局一無所知，供應商就知而唔講，食品安全把關咁兒戲，致癌食油同有毒鮮肉周街賣，又有乜出奇吖！

講起有毒食品，唔講猶自可，一講把幾火。食品安全關乎市民生命健康，監督工作寧緊勿鬆，偏偏港產官僚得過且過，敷衍塞責，個個都係大食懶。事實證明，食物衞生官僚可能就係有毒食品嘅受害者，癡癡呆呆，坐埋一枱。正所謂，城門失火，殃及池魚，內地黑心食品無處不在，無物不毒，香港靠呢班懶惰官僚把關，唔出事至奇。

嗱嗱嗱，日頭唔好講人，山東養雞場被揭發用禁藥催肥雞隻，事件愈鬧愈大，連國際知名快餐連鎖店都中咗招。所以話啫，內地無官不貪，奸商遍地，「速成雞」無王管，既然可以擺上知名食肆餐枱，要瞞過懵盛盛嘅港產官僚，唔係好難o架咋。

咁講啦，香港柴米油鹽醬醋茶乜都靠內地供應，致癌食油可一不可再，有毒鮮肉一次都嫌多，唔該港產官僚醒醒定定，唔好害到市民冇啖好食呀！

知恥近乎勇，今次食品安全事件當局係丟架o架嘞，快快做嘢補鑊啦。點樣補鑊？最緊要全力追查播毒元兇，堵塞規管漏洞，千祈唔好再懶懶閒，否則，市民唔會放過你哋o架，叮！