勇士媲美湖人馬刺
有成績自然多人撐，西岸球隊勇士今季戰績起飛，季票銷量短時間內激增，成功突破1萬大關，同湖人、馬刺等一線勁旅睇齊。有見及此，會方最近決定推出過癮figure，並且出動史堤芬居里及奇利湯臣兩位美男球星拍聖誕廣告冧Fans，勁識做！
出figure搵球星唱歌冧Fans
勇士早前爆冷砌低籃網及熱火一眾奪標熱門，創球會紀錄締造客場6勝1負佳績，隨着戰績脫胎換骨，球會季票自12月6日開始狂賣700套，成為聯盟今季賣出超過1.1萬套季票的8支隊伍之一。連續7季場均入座率更突破1.8萬人大關，亦令勇士與紐約人、馬刺及湖人等「大牌」球隊睇齊，「升呢」躋身聯盟最受歡迎隊伍行列，巴閉過有三巨頭的衞冕冠軍熱火。
為報答Fans，勇士早前特別趕工製造一系列球員figure免費派發給球迷，最近又出動史堤芬居里及奇利湯臣兩位俊男拍攝聖誕節宣傳片，當中2年生奇利湯臣連家傳戶曉的《Jingle Bells》都忘記歌詞，假鹿角又猛甩，Cute爆演出勢必冧死大批女Fans。
熱火 小牛重演總決賽翻版戰
勇士昨於主場以103:96擊敗黃蜂，繼續贏到開巷，不過教練麥克積遜賽後就貫徹謙厚作風：「練波前球會健身室爆晒棚，練波後都係一樣，有時夜晚9點鐘班球員仲喺訓練場練緊射波，正正係呢種氣氛同專業，令勇士今季成績突飛猛進！」
至於衞冕的熱火亦於主場以103:92輕取木狼取得兩連勝，不過明早造訪有射手美奧「着晒火」，兼剛於主場以107:100擊敗76人的小牛肯定惡砌，讓到8.5分略嫌太狠，這場10至11球季「總決賽翻版戰」寧捧下盤。（now635台及廣東體育周五早上10:30直播）
史堤芬居里（中）表現穩定，係勇士取得好成績嘅主要原因。（美聯社圖片）
