活化工廈太僵化 有地難用害萬家

咦，工廈變教會夠創意喎，唔通政府活化工廈計劃得蒙上帝感召，終於可以脫胎換骨造福萬民？

係就好咯，可惜唔係。相反正正因為活化工廈政策僵化，審批申請慢過龜爬，所以搞到傳道教會變咗違法租戶，罪過，罪過，叮！

件事係咁嘅，大圍工廠區近日得蒙聖寵，多個教會紛紛進駐，擅自將工廈單位改裝為辦公室同會堂，每逢周日崇拜人頭湧湧。大家都知，工廈消防配套相對簡陋，而教會活動人多擠迫，正如有區民擔心：「萬一有咩意外就大件事！」

點解教會要違規進駐呢？唉，咪又係嗰個老掉牙問題囉，租金高昂，一室難求！本報記者實地偵察期間，有在場人士承認由於外面租金昂貴，教會根本搵唔到合適地方，所以大半年前決定冒險搬入工廈，家陣仲等緊官老爺審批工廈嘅活化申請咁話。

嗱嗱嗱，你話港府係咪罪孽深重吖？土地房屋政策嚴重失敗，蟻民固然難覓安樂窩，家陣連教會都無處容身。最好笑嘅係，早前有一單新聞，由於租金瘋狂寸土尺金，有發展商居然連教堂都唔放過，收購之後經營違規劏房謀利，簡直上帝也瘋狂。教堂變劏房，工廈做教會，呢個就係香港房策亂象叢生嘅縮影，房屋官僚施政無能害苦蒼生，小心落地獄呀！

講番今次事件，問題就係活化工廈計劃虛有其表，官僚敷衍塞責。學者話齋，現時申請活化門檻高彈性低，做法僵化令人卻步，等如繼續任由空置工廈單位丟空養曱甴嘅啫。一○年當局推出計劃時，承諾會「快狠準」咁釋放一千四百幢工廈土地資源，結果兩年過去，成功獲批嘅申請只得二十宗。咁叫快狠準？好狠慢就真！

本來呢，香港地最缺地，將丟空嘅工廈單位活化成有用嘅土地資源，真係切合時勢o架，建廉價酒店又好，變寫字樓又好，甚至起公屋居屋都好，總之地盡其用，為民解急吖嘛。點知最唔化嘅係港產官僚嘅花崗石腦袋，市民嘅安居美夢恐怕等到世界末日都無可能實現。

活化工廈太僵化，有地難用害萬家。但點講都好，教會違規進駐工廈係唔啱嘅，好應該自我糾正。當然啦，教會更加應該祈禱，求上帝賜官老爺智慧與良心，用心施政，等香港少啲無殼蝸牛，阿們！