鄧格諾亞工時爆錶

効力公牛，慘過做牛！東岸勁旅公牛縱有王牌戴歷羅斯長抖，迄今仍能位列中央組榜首，教練泰保杜可謂居功至偉，可憐一班手足就打到殘，當中鄧格及諾亞就做到「爆晒錶」，球會高層與「無良僱主」泰保杜就「工時」問題陷入冷戰，一旦主將再有冬瓜豆腐，泰保杜隨時「係咁先」！

戴歷羅斯及咸美頓兩大主將打柴，教練泰保杜依然懶理手足死活以戰績行先，上周日鬥籃網繼續使殘主將，中鋒諾亞上陣42分鐘，小前鋒鄧格全場只抖了3分鐘，2人「工時」冠絕聯盟，難怪諾亞賽後叫苦連天：「老實講，比賽之後身體感覺好糟糕，要抖番幾日先掂！」

平均上陣40分鐘以上

據《紐約新聞日報》透露，公牛管理層與泰保杜就輪換時間存在極大分歧，擔心超負荷的上陣時間會令傷病問題加劇，消息人士更指部分高層近期與泰保杜「冇偈傾」，氣氛勁僵。之不過泰保杜就繼續我行我素，昨日向美媒表示：「我班手足廿幾歲仔咋喎，驚乜？以前積遜教練都慣咗安排最好嘅球員打40分鐘，我用人時間長又畀人話，用人時間少又畀人話，打波都係為咗贏啫，咁都唔啱？」

泰保杜搬埋積遜上枱

泰保杜搬埋「禪師」上枱之餘，又強調不會放棄球季，一班公牛主將睇怕有排捱，慶幸控衞軒域治已經復操，意大利射手比連尼利亦On Fire，明早主場恭候客場4連敗的塞爾特人仍可秤先，公牛讓4.5分要上盤。