扶貧若再捧蛋 民望必定低殘

港府扶貧，愈扶愈貧。呢句話講緊嘅貧困之人，其實唔止係基層市民，仲有前朝曾蔭權政府，事關一個口口聲聲話扶貧，實際一味只係做騷，搞到窮人愈來愈多愈嚟愈窮嘅政府，下場必然係誠信破產，淪為民望窮光蛋。

前朝政府扶貧不力，當今政府又點呢？表面睇嚟好少少，至少肯重設扶貧委員會，唔再翹埋雙手唔做嘢。呢嗱，委員會尋日首次開會，即刻宣布將會設立貧窮線，成為委員會扶貧第一炮。特首梁振英話喎，貧窮問題複雜，訂立貧窮線有助了解社會貧窮情況，制訂扶貧措施，委員會亦會研究善用關愛基金同鼓勵青年就業，解決本港貧窮問題。

嗱嗱嗱，新政府矢言扶貧，希望唔係講大話，否則誠信又多一個污點o架咋。咁講啦，扶貧工作千頭萬緒，訂立貧窮線總算行出正確第一步，不過係咪咁就代表滅貧在望呢？對唔住，以港產官僚嘅往績嚟睇，真係好難講！

係人都知，港府從來將扶貧當做騷，一味裝模作樣整色整水，扶貧委員會唔係真係搞扶貧，關愛基金唔係真心關愛窮人，咁又有乜可能唔愈扶愈貧呢？家陣新政府話設立貧窮線，話制訂扶貧措施，會唔會又係裝模作樣粉飾櫥窗呀？會唔會又係研究研究復研究呀？如果港產官僚死性不改，香港貧窮問題根本無可能解決！

所以咯喎，扶貧工作話複雜又得，話簡單又得，關鍵在於當局有無決心，有無魄力，有無幫助窮人嘅熱血心腸嘅啫。好似成立全民退休保障，研究成點呀？又好似十五年免費教育，進展如何呀？實實在在為基層做事，唔好再做騷了事，先至扶貧有望。

其實，貧窮線早就應該設立，只係貪曾掛住官商勾結，又驚扶貧不力嘅醜態暴露人前，所以先至死都唔肯設立啫。前朝政府扶貧得個樣，搞到香港貧窮人口衝破一百萬大關，六個港人一個窮，你都咪話唔丟架。嗱，前車可鑑，貪曾最後淪為民望窮光蛋，其中一個原因就係扶貧成績捧蛋！

貧賤夫妻百事哀，弱勢政府一樣o架咋，新政府如果想擺脫弱勢，唔該醒醒定定，扶貧工作千祈咪再敷衍塞責呀，叮！