史葛輸到癲？
反斗教頭玩轉NBA！隨着支柱艾榮及射手維特斯相繼打柴，弱上加弱的騎士最近連輸5場，教練史葛難免壓力大增，惟有癲番夠本鬆一鬆。之不過史葛就癲得過火，發布會搶接記者手機兼公然質疑聯盟執法水平之餘，更化身虐待狂向陣中新秀「施毒手」，行為舉止明顯黐上腦！
查實玩新秀乃NBA傳統，但長久以來皆由隊友扮演「玩家」角色，今次史葛就親自出動，勒令陣中新仔包括維特斯、施拿及奇雲鍾斯扮小學雞，強迫3人無論出戰主、客場賽事都要孭上粉紅色背囊兼推BB車報到，當中奇雲鍾斯就向傳媒大吐苦水：「BB車上面有個洋娃娃，背囊入面就要長期裝滿紙尿片同奶樽，係會畀人笑o架啦，但如果唔服從就有排受！」
質疑聯盟執法罰19萬
上周四史葛出席記者會時，就搶接1位女記者放在枱上的手提猛吹水，十足十大細路一樣。賽前勁風騷，但當騎士不敵木狼之後就即時變臉，暗示聯盟有「黑哨」：「大家都係剷籃次數差唔多，但木狼就有39個罰球，我哋就得9個，講唔通囉。」如斯斗膽質疑聯盟執法，史葛昨日終於被秋後算帳，被勁罰2.5萬美元（約19萬港元）。
艾榮復操對湖人有雞偷
騎士輸到開巷，慶幸陣中王牌艾榮已經復操，明早有望聯同傷愈的得分後衞維特斯復任正選，到訪的湖人無疑牌面秤先，不過昨日就以110:117不敵爵士，近6仗有5場失分過百，騎士受讓3.5分可望偷雞，捧下盤。（now678台周三早上8:00直播）
