《好報》加料炮製 讀者好事成雙

《好報》在手，周末無憂，聽日星期五，《好報》又同大家見面嘞。嗱，咪話太一叮唔提醒吖，今期《好報》加料炮製，打孖上出夠兩冊，總共一百一十二頁，一冊主打娛樂，一冊時事及潮流品味資訊，好事成雙，必定更加搶手，為免向隅，記得早啲起身喇。

唔係太一叮賣花讚花香，相信睇過上兩期《好報》嘅讀者一定印象深刻，明星藝人嘅內幕秘聞，政商名人嘅追蹤追訪，全部都係時下最熱門最火爆嘅話題。就以封面故事嚟講，創刊號獨家直擊報道阿嬌「私藏泡菜仔」，同埋第二期獨家專訪成龍點樣「分配身家」，簡直精彩絕倫，令人回味無窮，唔只港人津津樂道，連兩岸傳媒亦紛紛跟進報道。《好報》帶領潮流，非同凡響，正如讀者話齋，「極之吸引眼球」。

講到吸引眼球，聽日出版嘅第三期《好報》猛料如雲，必定更加令人目不暇給。有乜嘢猛料？太一叮不妨同大家透露少少先，除咗政商名人內幕秘聞呢啲唔少得嘅猛料，今期仲會介紹名人嘅家居，包你大開眼界；除此之外，國際大事、投資秘技、時尚潮流、外國娛樂……應有盡有。仲有吖，聖誕節就快到，《好報》有好介紹，點樣着靚衫、點樣送禮物、點樣品嘗美酒佳餚，一一話畀大家知，唔睇就走寶喇。所以話，好人有好報，叫得做《好報》，讀者必定有着數。

話時話，《好報》旗開得勝，氣勢如虹，讀者捧場固然重要，廣告商識貨更加抵讚。開講有話，做生意既要講運氣，更要講人氣，想推介商品同服務，帶領潮流，受到年輕族上班族追捧嘅《好報》，可以話係不二之選，尤其聖誕新年旺季，正係宣傳商品同服務嘅最佳時機，喺《好報》登廣告，相得益彰，讀者好，廣告商好，生意自然好，醒目嘅廣告商一定會作出醒目嘅選擇。

總而言之，有東方，冇窮人。精益求精，好上加好，係東方報業集團嘅宗旨，太一叮再同大家講少少秘密，今期《好報》打孖上出夠兩冊，只係前菜咋，遲啲可能一周出兩期添，到時就唔只「Thank God It's Friday」咁簡單，絕對值得大家期待！

最後再提醒各位，《好報》聽日除咗隨《太陽報》附送，亦會照舊喺港九新界一百幾個地點免費派發，記住吖，早上七點半開始派，手快有手慢冇。不過咁，萬一真係遲來半步咯喎，冇有怕，即刻買份《太陽報》，有太陽就有好報，好人好事陸續到！