亮點工程建社區 最怕監管戇居居

派錢咯！施政報告派錢咯！今次個個有份，各派一億！

嗱嗱嗱，太一叮唔係港鐵電霸巴士公司，並無患上「發錢寒開天索價症候群」，下月施政報告的確有傳會派錢，只不過唔係向每名市民派六千元，而係向十八區每區派一億元，理論上人人有份。

一億元用嚟做乜？消息係咁講嘅，畀各區建設「亮點工程」，數量不限，用途不限，目的係令到區議會銀根鬆動，將十八區搞得各適其適，有聲有色。有區議會已經聞風先動磨拳擦掌，有人想活化鴨寮街，有人想興建綜合性服務大樓，有人想美化市容，總之有錢就身痕。

咁講啦，特首梁振英多次強調：「地區問題，地區解決；地區機遇，地區把握。」亮點工程向地區開水喉，加快發展，立意係好嘅。之不過咁，所謂一法立，一弊生，何況地區諸侯即將迎來嘅唔止係一法立，仲係一億元，喺前朝特首曾蔭權見錢開眼嘅官場歪風之下，亮點工程會唔會變成「地區撥款，地區濫用；地區油水，地區私分」o架？

嗱，咪話太一叮以君子之心度小人之腹，區議員以權謀私詐騙公帑嘅醜聞大家都聽得多啦，官老爺監管公帑懶懶閒閒甩甩漏漏嘅奇聞大家耳熟能詳啦，一旦今次重蹈覆轍監管不力，亮點工程隨時就變篤數工程o架嘞。呢個工程篤數幾百萬元，嗰個基建篤數幾千萬元，大量公帑流入貪婪政客同不良商人荷包，絕對有可能發生。

最近有辦你睇啦，政府批地興建私家醫院，原意好吖，點知監管失職，一半土地居然變咗天價豪宅，最後益咗地產商。政府推強積金話為打工仔積穀防饑，聽落無問題吖，點知監管失策，最終肥咗基金經理。政府以利潤管制協議管制電費加價，正路吖，點知監管失敗，利潤管制協議變咗利潤保障協議，最終肥咗電霸。

家陣亮點工程如箭在弦，小市民難免要問，工程審批有無監管o架？監管制度會唔會又係甩甩漏漏o架？你知啦，撇開財迷心竅嘅不法行為，如果地區諸侯無心無肺胡亂揮霍，亮點工程唔係大而無當，就係浪費公帑，市民無受惠，納稅人受害咋！

一句講晒，亮點工程建社區，最怕監管戇居居，千祈唔好步上次派六千蚊後塵，搞到漏洞百出，天怒人怨呀，叮！