交津改行雙軌制 扶貧仍需全盤計

基層打工仔望到頸都長,終於等到喇。等到乜嘢?咪就係所謂嘅「鼓勵就業交通津貼計劃」囉。當局建議將申請資格由過往只容許以住戶為申請單位,放寬至可選擇以個人或住戶為申請單位,即係俗稱嘅雙軌制。

即係咁,雙軌制可以增加交津計劃嘅靈活性同開放度,令更多打工仔受惠,市民梗係歡迎喇。勞工及福利局話喎,優化計劃會喺立法會財委會通過後一個月正式生效。嗱,唔該各位尊貴嘅議員高抬貴手,做番啲正經事,快快趣趣通過,唔好再上演長者生活津貼拉布鬧劇,令打工仔失望啦!

有立法會議員形容交津優化計劃係「遲來的春天」,真係冇講錯。其實雙軌制早就有人提出,如果唔係前朝曾蔭權爵士擇惡固執,阻頭阻勢,基層打工仔使乜望到頸都長吖!

講開貪曾施政無能兼縮骨,真係火都嚟埋。呢嗱,安老、扶貧、樓市等等問題,佢邊樣唔係拖得就拖?甚至連雙非問題都要等到新政府果斷喝停,先至得到解決咋,貪曾正一累人累物,叮!

遲到好過冇到,交津雙軌制總算聊勝於無,不過咁,家陣衣食住行、柴米油鹽樣樣貴,基層市民面對嘅壓力又點止交通費貴吖。呢,有關注團體調查發現,每名學童每年課外活動支出接近三千蚊,好多基層同學因為負擔唔起而喪失學習機會,甚至產生自卑感,嚴重影響學習同生活。呢啲小朋友政府使唔使幫呢?

講到底,貧富懸殊不斷惡化,扶貧壓力愈來愈大,淨係靠小修小補、小恩小惠係唔夠嘅。本港貧窮人口達一百一十七萬人,平均每六名港人就有一個貧窮,低收入打工仔要幫,貧困長者要幫,基層小朋友亦要幫,政府要快啲做嘢,唔可以再拖啦。做乜嘢?首先要制訂扶貧政策囉。

嗱,當局都識得話「民生無小事」,咁就要講到做到喇。消除貧窮,改善民生係一項大工程,交津又好,派糖又好,都只係短期措施,只能治標,不能治本,最重要係針對貧窮問題,制訂長遠及全面嘅扶貧政策。話時話,當局既然已重設扶貧委員會,咁就要坐言起行,唔好又係得個講字喇。

計太一叮話齋,民生問題千頭萬緒,如果當局仲係好似前朝咁,鼠目寸光,敷衍了事,頭痛醫頭,腳痛醫腳,只會重蹈愈扶愈貧覆轍嘅咋,叮!

第一手消息請下載on.cc東方互動iPhone/iPad/Android/Windows Phone Apps