鳳凰城奇招拉客

NBA雙雄出招救市！星味欠奉的鳳凰城太陽近兩季都無緣季後賽，場均入座率暴跌至20年來新低，會方為走出困境，決定破天荒推出「唔過癮可以回水」奇招挽救入座率，開創NBA球隊先河；至於「波神」米高佐敦為谷波衫銷量，亦計劃將旗下球隊山貓改名冧Fans。

缺乏球星每場4000「吉位」

隨着拿殊今季改投湖人，以達基斯、哥達及比士利擔大旗的鳳凰城毫無號召力，即使場均門票價格僅屬聯盟中等級的70美元（約542港元），奈何今季主場入座率只得81.8%（見表），每場足足有成4,000個吉位。

有見及此，太陽市場部決定搞噱頭救市，於本周五主場鬥小牛一戰推出「唔過癮可以回水」奇招，承諾球迷當晚一定盡興而歸，但就暫時賣個關子，隻字不提具體方案。球會會長羅尼表示：「鳳凰城家陣冇球星，但唔代我哋嘅比賽唔好睇。當晚（香港時間12月7日）如果邊位睇得唔過癮、唔滿意嘅，可以喺12月31日前上球隊官網填張Form再寄番張波飛嚟，我哋絕對會回水，球會咁做係有一定風險o架啦，但我對球隊有信心！」

馬刺「傷害球迷」罰193萬

「過唔過癮」可以好主觀，當地有奸詐網民就已經度好橋屈水，聲稱只要鳳凰城輸波、場內職員斟瀉啤酒又或者廁所排長龍就會要求回水，隨時蝕爆鳳凰城都似！沉爆鳳凰城昨日以97:101不敵速龍，今晚造訪錄得近40年來首次單月獲11場勝仗的紐約人聽炒，紐約人讓7.5分要上盤。

另邊廂，夏洛特《觀察者報》就指新奧爾良黃蜂班主賓臣希望易名，以便突出路易斯安那州的特色，米高佐敦睇準黃蜂復古球衣極受年輕球迷歡迎，故計劃執二攤將旗下隊伍山貓改名，將黃蜂「帶返」夏洛特冧球迷。Fans乃球會米飯班主，馬刺前日派副選招呼熱火令球迷大失所望，聯盟昨晨決定以「傷害球迷」為由重罰該隊25萬美元（約193萬港元）。