西九填氹百二億 貪曾遺禍恨難填

一夜夫妻百二蚊，一塊爛地虛度四載光陰嘅代價又係幾多呢？係百二億！

呢塊爛地就係西九文化區。大家可能好奇怪，西九唔係上咗馬嘅咩？工程撥款都批咗幾年啦！無錯，前朝曾蔭權政府的確喺○八年已獲立法會撥款二百一十六億元發展西九，可惜敗家仔有錢喺袋就游手好閒不務正業，事隔四年西九大部分工程居然仍未展開，黃金寶地喺度日日養曱甴。

最大鑊嘅係，貪曾政府蹉跎歲月，但係通脹從不等人，西九工程費用好似起樓咁節節上升，結果整體造價嚴重超支，預計明年又要攤大手板追加一百二十億元，比原本預算激增超過五成。唉，納稅人嘅錢使得真係冤枉呀！

係大拿拿百二億呀，夠畀全港幼稚園學生免費讀書兩年，夠幫二十萬名無殼蝸牛交劏房租金十年，夠興建一條港鐵西港島支線，夠建造半個啟德體育城……低下階層一百世唔食唔用都儲唔到百二億，家陣貪曾一個唔覺意就倒咗落鹹水海，唔怪得前朝政府成日話唔夠錢扶貧啦。

嗱，對於一夜夫妻百二蚊嘅動物本能，世人形容為苟合，至於貪曾四年胡混百二億嘅禍港行為咯喎，就叫苟政。向富豪黐飲黐食就殫精竭慮到連菜心肥雞都舔埋，為民施政就得過且過胡混度日，一個西九就白白糟蹋公帑百二億，香港人前世欠咗你咩，貪曾？

嗱嗱嗱，百二億只係講緊西九咋，貪曾禍港七年一成無事，乜嘢十大基建，乜嘢六大產業，唔係無影無蹤，就係變晒空中樓閣，工程延誤造成嘅公帑浪費不計其數。沙中線由三百八十二億變咗六百億，港珠澳大橋由四百二十億變咗四百八十五億，港鐵西港島線由六十億變咗一百二十七億……呢一塊塊施政爛地，新政府填氹填得幾多鑊？

唔係嘞，西九填氹百二億，貪曾遺禍恨難填，大家為免泥足深陷，睇嚟都係時候發揮一下創意空間嘞。例如話，捉貪曾填數啦，佢有咁多權貴朋友，百二億好易籌旗啫，橫豎西九一直盛傳係佢隻手遮天、明益利益集團嘅肥豬肉，由佢哋呢班牛鬼蛇神承擔超支費用都好應該吖。

再唔係嘅話，就將西九變新市鎮，橫豎新界東北發展計劃難產居多，不如就喺西九興建公屋同居屋，紓緩基層住屋困境啦。四十公頃土地，不知興建到幾多幢公屋同居屋咯，叮！