《好報》好事成雙 讀者齊聲讚賞

好就係好，《好報》果然好得有道理！呢份雜誌式報章異軍突起，一鳴驚人，首兩期受到全城熱捧唔在講，尋日出版嘅第三期加料炮製，分成兩冊，好事成雙，更加贏得一致讚賞。

話明好事成雙，自然人人捧場。今期《好報》受歡迎程度比預期更加熱烈，除咗隨《太陽報》強勢附送之外，喺全港百幾個地點免費派發，一小時內就派晒幾十萬份，好似賓虛咁嘅場面，連同《太陽報》銷量亦更上一層樓，直頭係相得益彰。蘇東坡話「賴有明朝看潮在，萬人空巷鬥新妝」，太一叮就話「賴有今朝看《好報》，萬人空巷齊捧場」。

呢嗱，尋日又有唔少讀者遲來半步，大嘆走寶。無計喇，太一叮除咗講聲對唔住，只能再次提醒大家，手快有手慢冇，下次請早。

《好報》人見人愛，車見車載，聽吓讀者今次又點講吖嗱。今期第二冊嘅「好政經」獨家專訪立法會議員陳志全，呢位「慢必」一啲都唔慢，尋日出席立法會會議前火速購買《太陽報》，連同《好報》一齊歎，佢大讚專訪內容人性化，可助讀者從其他角度了解政治人物真實一面，仲話會通知好友慢慢欣賞添。

聽完政治人物嘅意見，再聽聽商界人士嘅評價。中華廠商聯合會副會長吳永嘉就話嘞，佢本人最鍾意八卦政商界消息，《好報》內容豐富，又經常有獨家內幕消息，完全符合佢對報章嘅要求；而同樣重要嘅係，《好報》紙質及油墨質素好，啱晒佢呢種有潔癖嘅人。

正所謂，人同此心，心同此理。讀者固然識貨，廣告商亦夠晒眼光，佢哋大讚《好報》內容豐富，設計醒目，印刷精美，物超所值。講起都好笑，唔止讀者爭攞《好報》，連廣告商都爭埋一份，爭乜嘢？咪爭攞好位登廣告囉。話時話，聖誕新年係銷售旺季，《好報》咁受歡迎，讀者好，廣告商好，生意自然好，醒目商家快人一步，佔盡先機，直情抵讚兼抵賺喇！

開講有話，成功非偶然。《好報》旗開得勝，節節領先，全賴讀者同廣告商嘅捧場及支持，你哋嘅鼓勵就係我哋嘅動力，太一叮除咗再次講聲多謝，亦承諾一定會做到精益求精，好上加好。喺度畀少少驚喜大家先，《好報》不斷加強編採陣容，今次加碼出兩冊只係前菜咋，日後可能每周出兩期甚至更多添。一句講晒，猛料陸續有來，驚喜值得期待！