扶貧不能靠吹水 粉飾太平更戇居

聖誕快樂！本來呢，今日係普天同慶嘅日子，應該開開心心輕輕鬆鬆，無謂提起啲傷心事。但無計啦，鬼叫前朝政府耽於逸樂只顧吃喝咩，搞到苦苦掙扎嘅窮人大軍早就衝過一百萬大關，試問太一叮點能夠學官老爺一樣，當貧窮問題透明呢？

無錯，貧窮問題持續惡化已成香港社會嘅殘酷現實，絕對唔係聖誕老人天鹿行空嘅縹緲神話，如果唔係，大家亦唔會為咗一條貧窮線水平而拗餐飽，叮！

嗱，扶貧委員會已經重新開業，扶貧工作仍然紙上談兵，莫講話新措施空空如也，連貧窮線點樣劃界都十畫未有一撇，你都咪話唔濕滯。所以咯喎，身兼樂施會總裁嘅扶貧委員會成員余志穩就提出嘞，不如將貧窮線定喺家庭入息中位數一半啦。如果按呢條線劃界，本港現時約有一百萬貧窮人口，余志穩叫政府接受現實，唔好諗住透過技術性切線減低貧窮人口數目。

始終做過社會福利署署長，余志穩對官僚陋習簡直瞭如指掌。佢點解要叮囑官老爺唔好撳低窮人數目呢？因為港產官僚鍾意自欺欺人囉，一味粉飾太平整色整水，結果搞出扶貧扶貧愈扶愈貧嘅國際笑話。

同樣道理，余志穩點解要為設立貧窮線水平大聲疾呼呢？因為知道港產官僚最鍾意議而不決囉，扶貧懶懶閒閒唔嗲唔吊，如果唔大聲嗌醒佢哋，窮人餓死咗貧窮線都未定到出嚟啦！

係囉，扶貧不能靠吹水，粉飾太平更戇居，釐定貧窮線水平固然重要，速速推出扶貧措施仲實際啦。須知道，貧窮線就係扶貧起步線，如果連設立貧窮線都爭拗不休，扶貧工作幾時開展呀？三餐不繼嘅公公婆婆唔等得幾耐o架咋！

至於編造窮人數目假帳呢種可恥文化，官老爺更加要戒甩佢。如果繼續扶貧當做騷，只會繼續大失人心，由於扶貧不力而淪為民望窮光蛋，前特首曾蔭權就係人辦！

香港窮人滿山滿谷，貪曾居然一直唔肯設立貧窮線，點解呀？一來因為佢長期傍住富豪黐飲黐食，套用佢嘅名言就係想窮都難，所以眼中從來無窮人。二來咯喎，就係要掩飾自己扶貧不力嘅無能醜態，以免年年跳升嘅赤貧人口大白天下，自欺欺人嘅悲慘下場就係成為過街老鼠，人人喊打。

前車可鑑，新政府知點做啦，實實在在扶貧，速速磅，唔好兩頭望，叮！