問責班子又加人 適度有為何處尋

今日係傳說中嘅世界末日，有人歡喜有人愁，對一班政治新貴嚟講，世界末日正正係佢哋人生另一春嘅開始。呢，港府委任新一批副局長同政治助理，再有多人加入管治團隊，太一叮冇其他要求，只希望今次唔好又係所託非人，濫竽充數啦！

以前就話人多好辦事啫，依家又點呢？新班子增添問責官員，港府嘅施政亂象係咪就有望改善呢？管治弱勢係咪就有望扭轉呢？希望愈大，通常失望愈大，睇嚟都係未可樂觀嘅喇。嗱，新政府上場短短半年，已經多次委任副局同政助，管治團隊不斷膨脹，可惜施政效率唔只無提高，反而每況愈下，是非不斷，搞到永無寧日。

講到尾，政治問責制不倫不類，先天不足，後天失調，對施政唔止毫無建樹，反而添煩添亂，根本就係港府施政亂象叢生嘅禍根。更加不堪嘅係，當年曾蔭權爵士為咗打造「私家軍」，仲喺問責制上面僭建多一層副局政助，結果爆出「八國聯軍」醜聞，民望應聲崩塌，跌到阿媽都唔認得。新政府唔拆走呢件政治僭建物，反而不斷喺上面加建，小心冧檔呀，叮！

講起都好笑，擴大問責制變成日久失修政治僭建物，現屆政府本來仲想疊床架屋，推出五司十四局重組方案，點知受阻於立法會，不了了之。依家諗番轉頭，好彩重組方案過唔到立法會咋，如果唔係，管治團隊拉雜成軍，本來已經醜聞多多嘅喇，再多幾個問責官員，容乜易仲多醜聞o架？

所以話啫，數量唔代表質素，問責官員貴精不貴多。嗱，依家又有政治新貴上場，希望佢哋生生性性，醒醒定定，唔好再爆出醜聞，添煩添亂喇。須知新政府跛腳弱勢，動輒得咎，唔捱得幾多明槍暗箭嘅咋！

講起就令人感慨，梁振英政府上場時躊躇滿志，話要「穩中求變、適度有為」，家陣穩中求變喺邊呢？適度有為又點呢？世界末日平安度過，對於港府嚟講，唔知係好消息，定係壞消息！