貪污投訴激增 貪曾遺禍香江

北大人話，內地嘅貪腐問題已經到咗亡黨亡國地步，咁香港嘅貪腐問題又點呢？即係咁，香港雖然仲未嚴重到亡黨亡國嘅地步，但亦唔好得幾多，喺貪官蛀蝕之下，廉政同法治招牌已經搖搖欲墜嘅喇。

嗱，唔係危言聳聽o架，而係有事實根據。廉政公署最新資料顯示，今年首十一個月，總共收到三千七百幾宗貪污投訴，比上年同期上升百分之二，當中三分一涉及政府部門，按年急升一成三。即係話，公僕貪污情況惡化，問你怕未！

唔怪得香港廉潔指數國際排名跌到嘭嘭聲喇，一年急跌兩級至第十四位，創下五年新低，遠遠落後於老對手新加坡，真係丟架！

話時話，三千七百宗貪污投訴入面居然有三分一涉及政府部門，講出嚟都嚇親人，當局仲話未見集團式貪污再度出現喎。喂，政府部門有千幾宗貪污投訴，咁仲唔夠離譜呀，唔通真係要好似內地無官不貪先至識驚咩，叮！

開講有話，上有所好，下必甚焉。政府部門貪污問題日趨惡化，一來因為前特首曾蔭權爵士「貪遍省港澳，歎盡海陸空」，樹立壞榜樣，上樑不正下樑歪，立心不良嘅公僕自然有樣學樣，貪得就貪喇。二來咯喎，廉署執法不力，甚至官官相衞，亦係主要原因。唔係咩？廉署查貪曾懶懶閒，唔嗲唔吊，肅貪利器開始生銹，貪官污吏梗係有恃無恐，膽大包天啦。

所以話啫，維護香港廉政及法治，廉署任重道遠，絕對唔可以偷懶，更加唔可以縱容包庇。嗱，廉署查貪曾已經超過十個月，究竟查成點、有冇進展、幾時至有行動，到依家仲係無聲無息，你話唔係包庇都冇人信喇，咁搞法，香港廉潔指數想唔跌都幾難。貪曾貪腐成性，鐵證如山，咁都可以逍遙法外，其他貪官污吏仲唔膽生毛咩，再咁落去，成個香港烏煙瘴氣，貪污投訴數字隨時升爆燈都似！

講起都幾弔詭，深水埗驚現「黃金百慕達」，某牌子客貨車一進入即死火，唔通廉署亦隱藏一個「廉政百慕達」地帶，查貪官查到死晒火？如果真係咁，唔止香港嘅廉政同法治招牌遲早死得，廉署塊金漆招牌即時摺得添呀！

一句講晒，要還香港清白，廉署就要速速做嘢，唔好再兩頭望，叮！