三毒夾擊好攞命 防疫系統莫再病

這個冬天好陰濕，保重身體咪疏忽！無錯嘞，冷鋒殺到，大家記住保重身體呀，事關陰陰濕濕嘅，唔只係霧雨天氣，仲有致命病毒，新沙士、禽流感、季節性流感三毒拍門，防不勝防，諗起都令人打冷震！

嗱，病毒陰濕，殺人於無形，唔係講笑o架。好似俗稱新沙士嘅新型冠狀病毒咁，原來今年四月已經唔聲唔聲入侵中東國家約旦，世衞組織最新證實當地兩宗死亡個案，令全球確診個案增至九宗，死亡人數增至五人，即係話，死亡率超過五成，點到你唔驚？

所以咯喎，食物及衞生局局長高永文都出來喊驚嘞，話會去信呼籲全港醫生提高警覺，並會加強監測不明肺炎個案咁話。佢仲發預警，指新沙士喺中東不斷擴散，其他地區又有高致病禽流感爆發，加上本港踏入季節性流感高峰期，三種病毒夾擊之下，市民要注意衞生，加強防範。

嗱嗱嗱，都話三毒拍門唔講得笑o架啦。港府以前面對病毒危機，每次表現都好似一隻患咗禽流感嘅病雞咁款，瘟瘟沌沌，反應遲鈍，今次居然識得知驚，提早示警，一來可能因為防疫把關換咗掌門人啦，渾渾噩噩嘅周一嶽滾蛋落台，當局終於有機會從沉睡之中慢慢甦醒過來，二來咯喎，證明三毒夾擊確實危機四伏，睇漏一眼隨時爆大鑊！

太一叮唔係杞人憂天o架，病毒無疆界，話嚟就嚟，唔使攞簽證o架，千里之外嘅病疫一夜之間就可以兵臨城下。更何況，香港係一個旅遊城市，每日出入境人流高逾百萬人次，容乜易畀病毒入侵，聖誕假期就係三毒襲港嘅高危時期。如果當局把關鬆懈，麻痹大意，香港隨時再次淪為疫埠，絕對唔係講笑。

咁講啦，喺病毒天氣皆陰濕嘅日子，要防止香港淪陷，市民固然要提高警覺，自求多福，但最重要嘅都係防疫官僚提高警覺，本港防疫系統唔好又病到瘟瘟沌沌。你知啦，沙士、禽流感、豬流感、手足口病，港府餐餐後知後覺，渾渾噩噩，佢哋嘅表現仲得人驚過啲病毒呀！

高永文提醒市民，太一叮亦不妨提醒高永文，記得提醒班港產官僚呀，防疫攸關人命，絕對唔可以重蹈覆轍掉以輕心，一旦被病毒攻陷，香港又淪為滿城口罩嘅悲情城市，太一叮第一個叮爆你哋，叮！