港府出爾反爾 保育本末倒置

市民嘅保育意識愈來愈高，港府為咗顯示順應潮流，亦時時將「保育」掛喺口邊。可惜，講就天下無敵，做就有心無力，所謂保育，根本就係吹水唔抹嘴。

嗱，港府尋日公布兩項有關保育嘅決定，又係得啖笑。第一項係放棄將山頂何東花園列為古蹟，以免引起產權爭議喎；第二項係取消舊政府總部西座重建計劃，原汁原味保留成個政府山。即係話，西座話拆又唔拆，而何東花園就話保留又唔保留，你話係咪搞笑吖。

講開何東花園，真係好有特色o架，呢座大宅融合中西建築特色，收藏曾國藩、左宗棠等名人真迹，接待過劇作家蕭伯納等風雲人物，係香港華人崛起嘅歷史見證。所以咯喎，唔少市民希望保留何東花園，政府亦一度將大宅列為暫定古蹟。點知你肯業主唔肯，保育方案傾來傾去都傾唔掂，當局卒之投降，聲稱為免業主提出訴訟，放棄將何東花園列為古蹟。換句話講，大宅好大機會被拆，政府保來保去得個吉。其實咁又難怪嘅，何東花園塊地皮閒閒哋值幾十億，保育代價好大o架，就算政府肯畀錢，納稅人都未必肯喇！

至於政府山西座，一來冇乜歷史意義，二來冇乜建築特色，保育價值明顯比唔上何東花園。當局本來只計劃保留東座同中座，將西座重建成商廈，增加中區寫字樓供應。今年六月，古物諮詢委員會對重建方案開綠燈，將西座評為保留價值較低嘅二級歷史建築。點知短短幾個月後，港府忽然轉軚，決定完整保育成個政府山，交畀律政司以及同法律相關嘅非政府組織使用喎。西座不留不留終須留，好明顯係向反對團體低頭，出爾反爾啦！

其實，市民唔係反對保育政府山，但保育都要有個準則o架，究竟西座應唔應該保留，保育同發展點樣平衡，應該交畀專業人士判斷，然後衡量利弊，而唔係隨風擺柳，一時一樣。正如古諮會成員話齋，政府繼續使用西座雖然可以平息爭議，但成座大廈老化嚴重，維修成本隨時仲貴過重建。

講到底，保育係一門好大嘅學問，要做好保育，先要制訂全面政策，邊啲建築應該保留，點樣保留，以及點樣解決賠償問題，都應該有一個清楚嘅準則同計劃。如果唔係，保育政策民粹化，進退失據，應拆嘅唔拆，唔應拆嘅亂拆，盞添煩添亂嘅咋，叮！