《好報》旗開得勝 多謝讀者捧場

《好報》隆重登場，全城喜氣洋洋；版面清新脫俗，讀者眼前一亮。好人有好報，讀者齊捧場，恭喜晒！多謝晒！

唔係太一叮賣花讚花香o架，用「墟冚」嚟形容《好報》創刊號尋日嘅派發場面，一啲都冇誇張。呢，除咗隨《太陽報》附送之外，朝早七點半左右喺港九新界一百幾個地點免費派發，市民爭先恐後，務求先睹為快，眨吓眼已經派晒，有派報員仲被心急讀者抓傷手添，真係唔好意思。有啲讀者來遲一步，立即購買《太陽報》補飛，大讚買一送一，內容豐富，超值到極！

所以話，有麝自然香，《好報》一鳴驚人，讀者讚不絕口，廣告商好評如潮，呢啲都係意料中事。道理好簡單，《好報》內容豐富，獨家猛料篇篇精彩，識貨之人梗係識揀喇。廣告商眼光獨到，喺《好報》落廣告，相得益彰，呢啲咪就係好人有好報囉。

唔怕唔識貨，最怕貨比貨，近年免費報成行成市，唔少濫竽充數，睇完等於冇睇，唯一貢獻就係畀公公婆婆當廢紙攞去賣，換番個平價早餐。依家就唔同喇，《好報》一出，誰與爭鋒，睇怕有啲免費報隨時摺埋都得咯。其實咁都好嘅，唔使再浪費紙張吖嘛，對環保都係好事嚟嘅。

講開又講，家陣香港妖孽橫行，淫媒為患，是非顛倒，烏煙瘴氣，香港人幾乎谷到爆。《好報》秉承正義傳媒嘅宗旨，弘揚正氣，掃除邪氣，簡直係一股清流。正所謂，善有善報，惡有惡報，《好報》嘅最大特色就係追蹤追擊名人明星，深入發掘內幕秘聞，好人固然有好報，但壞人咯喎，就要好自為之喇。嗱，「香港第一貪」曾蔭權爵士就係人辦嘞，佢「貪遍省港澳，歎盡海陸空」，以為神不知鬼不覺，點知畀東方報業集團獨家踢爆，落得個身敗名裂嘅下場。家陣《好報》橫空出世，懲惡揚善，牛鬼蛇神更加無所遁形喇。

不過咁，如果名人明星識做，同《好報》合作，大家好來好去，保證可以相安無事；相反，如果有見不得光嘅秘密，仲要遮遮掩掩，閃閃避避，《好報》一定會窮追猛打，大爆特爆，你哋實走唔甩o架。正所謂，「合作有好報，閃避冇面畀」，「好來好去有好報，阿芝阿佐追瘦你」，呢啲就係《好報》嘅宗旨嘞，知冇！

好嘅開始係成功嘅一半，《好報》旗開得勝，可喜可賀，東方報業一定不負眾望，再接再厲，做到好上加好。太一叮再提醒一次，要睇《好報》，周五請早！