牛肉一斤百二蚊 港人遲早不知味

「孔子聞韶，三月不知肉味」，大家有冇聽過呢個典故呢？話說孔子喺齊國聽咗美妙嘅《韶》樂，回味無窮，三個月內食肉都唔知係乜嘢味道。呢個古仔可能誇張咗啲，喺現實當中，香港人可能真係好快就有同樣嘅體驗，不過唔係因為天籟之聲，而係因為天價牛肉。

嗱，內地供港活牛又加價喇，今次加幅超過半成，零售價估計要加到每斤百二蚊。唔講唔知，牛肉批發價今年內已經加咗六次，累積升幅近四成，再咁加落去，食乜嘢肉都冇味喇！

話時話，牛肉加價只係冰山一角嘅咋。政府日前公布上月通脹數字，基本通脹率維持喺百分之三點八水平，表面上冇乜變化，其實呢個數字根本反映唔到基層市民面對嘅困境。係人都知，近年物價不斷上升，尤其係同民生息息相關嘅樓價、租金、食品、交通等，長升長有，基層家庭壓力愈來愈重，為咗應付通脹，早已經節衣縮食，慳得就慳，正一度日如年，苦過弟弟。

呢嗱，有環保組織調查發現，全港有超過廿一萬個家庭生活喺「能源貧窮」線以下。乜嘢叫做「能源貧窮」？簡單講，即係用於能源方面嘅開支超出家庭收入一成。咪以為呢樣嘢無關宏旨，其實對基層市民生活質素影響好大o架。

譬如，唔少能源貧窮戶居住環境欠佳，唔係住劏房就係板間房，好多連窗口都冇，唔開冷氣根本頂唔順。弊在電費年年加，令基層家庭百上加斤，為咗節省開支，惟有慳得就慳，盡量少用電，你話嘞，咁樣生活質素點會改善吖！

講開能源貧窮，最受影響嘅就係貧窮長者，為咗慳錢，炎炎夏日唔捨得開冷氣，凜凜寒冬唔敢開電暖爐，你話點頂吖。據講今年冬天氣候反常，可能出現罕見嘅「千年極寒」，真係唔敢想像生活喺「能源貧窮」線下嘅公公婆婆點樣捱過呢個寒冬。

最弊屋漏偏逢連夜雨，香港物價飛漲，而人民幣就持續升值，雙重夾擊，搞到港人冇啖好食。現屆政府口口聲聲「民生無小事」，最緊要講到做到，千祈咪學前朝咁齋噏冇行動吖。咪話太一叮唔提醒，嚟緊嘅新一年度施政報告及財政預算案，既要有扶貧嘅長遠規劃，亦要有對抗通脹紓解民困嘅實質措施，如果虛應故事，惹起民怨，盞唔衰攞嚟衰嘅咋，叮！