東方太陽照 好人有《好報》

東方紅，太陽升，東方報業集團嘅全新刊物《好報》即將橫空出世，閃爍登場。好人有好報，開心快樂正能量嚟喇！

嗱，大家記住呢個日子呀，今年十一月三十日，內容豐富嘅《好報》正式同讀者見面，第一階段逢星期五隨《太陽報》附送，仲會喺全港各區旺點免費派發；第二階段每周出版兩日，適當時候仲會分拆為兩疊，甚至獨立出版添。一句講晒，讀者有福喇！

東方出品，必屬佳品。唔係太一叮賣花讚花香，實力決定一切，有東方報業集團呢塊金漆招牌，有正義傳媒無堅不摧嘅正能量，《好報》絕對係信心嘅保證，其他免費報紙同八卦雜誌點可以相提並論呀。各位，等住睇好嘢喇！

話明係好嘢，梗係唔簡單，等太一叮先同大家透露《好報》有幾堅喇。呢份雜誌式報章內容包羅萬有，豐富多采，有政商名流嘅追蹤追訪，亦有藝人明星嘅內幕秘聞，更有消閒娛樂同美酒佳餚嘅好介紹，當然亦唔少得世界各地嘅奇聞趣事。總而言之，好猛料、好熱鬧、好八卦、好流行、好富貴、好滋味、好得意、好鬼盞、好鬼索……好到數唔晒。

話時話，近年狗仔爆料文化逐漸流行，社會普遍接受，讀者樂在其中，除非閣下係火星人，否則，茶餘飯後少不免涉及坊間八卦、名流軼事、明星揭秘等話題。東方報業與時並進推出《好報》，實行大爆特爆，正正切合讀者需要。太一叮敢寫包單，以東方報業龐大嘅編採隊伍，加上《太陽報》嘅創新精神，《好報》必定可以做到盡善盡美，好上加好，為傳媒帶嚟一番新氣象，為讀者帶嚟一番新體驗。正如奧運精神咁，更快更高更強，點止狗仔爆料文化咁簡單！

講開又講，《好報》個名改得真係好，好人有好報，好事唔怕做。香港家陣壞人當道，妖孽為患，搞到成個社會烏煙瘴氣，亂七八糟，最需要開心快樂正能量。《好報》橫空出世，對於好人梗係好消息，但對於壞人咯喎，睇怕有得震冇得瞓。正所謂，善有善報，惡有惡報，時候一到，一切都報。東方報業神通廣大，正義傳媒無所畏懼，無論邊個做咗壞事，好似貪曾咁，《好報》都會將佢哋嘅醜聞摷晒出嚟，暴露於光天化日之下，牛鬼蛇神從此無所遁形，唔驚就假。

總而言之，追擊藝人名人，好料盡在《好報》；周五睇《太陽》，人人有好報。大家千祈千祈唔好錯過呀！