弱勢政府無計 增加土地齋噏

聖誕佳節又到，無殼蝸牛今年有乜願望？梗係希望有瓦遮頭喇。可惜吖，呢個願望睇怕都係得個望字，因為聖誕老人無能為力，幫唔到你。

一直以來，房屋問題係港人最大噩夢，樓價失控，租金飆升，唔知幾多人望樓興嘆。現屆政府將增加房屋供應作為施政重中之重，講就講得好聽喇，弊在巧婦難為無米之炊，依家連地都冇，又點樣增加房屋供應吖？呢，當局無計可施，竟然病急亂投醫，前排想打「啟德體育城」主意，搞到滿城風雨，最近又改打教育界主意，想將兩幅原來規劃興建私立大學嘅地皮改建公屋，問你服未。

究竟點樣先至可以解決房屋問題？房協主席鄔滿海獻上「妙計」，建議當局盡快增加土地供應，話短期可以先贖回政府空置寫字樓、宿舍及停車場等，透過規劃改為住宅用途；佢又重申房協會加快舊屋邨重建，提供更多唔同類型嘅資助房屋喎。

鬼唔知阿媽係女人咩！「盡快增加土地供應」講就容易，試問地從何來？無論點都好，公屋輪候冊申請人數已突破二十一萬，實現三年上樓嘅目標只會愈來愈難，再唔盡快諗辦法，民怨只會愈來愈高嘅咋。

講番房協嗰筆，重建舊屋邨無疑係一個辦法，但淨係安置原居民睇怕都有排搞喇，家陣樣樣政治化，政客抽水玩嘢，阻頭阻勢，重建計劃分分鐘變成持久戰，遠水又點救近火吖。

呢嗱，立法會尋日討論新界東北發展計劃，有村民擔心「失去家園」；有非原居民批評當局強搶土地等同「強姦」；更有團體話，如果當局撥出粉嶺高爾夫球場三分一土地起樓，足以解決住屋問題喎。你一言，我一語，都唔知聽得邊個。

講開又講，香港唔係冇地可用，而係有地唔畀用。目前已開發土地僅佔總面積兩成幾，未開發嘅土地仲有大把，可惜弱勢政府動輒得咎，寸步難行，發展新界東北被指「割地賣港」，填海又被指破壞環保，你話仲可以點做吖？

唉，無計喇，梁振英政府上台後頭頭遇着黑，反對派搞搞震，建制派離心離德，日嘈夜嘈，簡直永無寧日。計太一叮話齋，再咁落去，唔止房屋問題解決唔到，其他民生問題都係一事無成嘅咋，香港繼續沉淪，遲早返去小漁村年代都似，叮！