巴格蘭尼交換加素
巴格蘭尼犯眾憎冇得留低！NBA轉會窗今日重開，速龍「呃錢狀元」巴格蘭尼為博轉會無所不用其極，即使因右手手(月爭)韌帶受創要抖3周，昨晨仍然手停口唔停，向意大利傳媒數臭球會，怒插速龍乃「史上最廢」，出位言論辣着高層及球迷，有望「如願」鬆人與湖人大前鋒加素互換球會，炮製轉會窗重開後首單重大交易！
NBA轉會窗今日重開，騎士中鋒華拿祖、爵士前鋒米沙比及木狼2年生戴歷威廉士都屬熱門交易人物，但就以巴格蘭尼最大機會走人。未計昨日對小牛，速龍開季23戰贏得4場，巴格蘭尼輸到冇癮，昨晨接受意大利《La Gazzetta》電話專訪時乘機「做嘢」，逼球會放人，這位06年狀元稱：「其實我閒閒哋可以一場攞50分，但係球隊近4季輸多過贏，講乜都冇用啦，速龍絕對係聯盟史上最廢球隊，如果有得轉會嘅話我一定走，不過唔到我話事。」
高層扯火 連加特朗一齊踢走
仍有3年總值3,325萬美元合約在身的巴格蘭尼，今季無論場均得分（16分）及籃板（4.3個）數字都是08至09球季後新低，如今「唔知衰」鬧爆球會，速龍高層已經忍無可忍，昨晨隨即召開緊急會議，計劃將巴格蘭尼及控衞加特朗送走，消息指戰績同樣低迷的湖人亦有意放走加素，況且速龍一向鍾情非本土球員，故此雙方大有機會一拍即合。
即時返彈 大勝小牛追擊火箭
速龍決心與巴格蘭尼斬纜，昨日即時反彈，憑後備基利沙攻入全場最高20分，以95:74大炒來訪的小牛，今晚造訪火箭有力乘勇搶W，受讓3.5分要下盤。
加特朗（中）或會跟巴格蘭尼一齊被送走。（美聯社圖片）
速龍雪藏巴格蘭尼後，即刻反彈。（美聯社圖片）
