呢劑藥都咪話唔重，持有物業兩年內轉售，最高要支付一成半嘅額外印花稅，實在得人驚，炒家簡直冇啖好食，難怪招數一出，樓市即刻水盡鵝飛。
炒家興風作浪，樓價長升長有，無殼蝸牛望樓興嘆，家陣政府出重招打擊炒風，冇人會反對。不過，怕就怕城門失火，殃及池魚，到頭來壓唔壓到炒風仲未知，但真正用家受株連就係人都睇到。
唔好以為太一叮危言聳聽。呢，政府嘅措施漏洞多多，向短期內轉售嘅物業徵收額外印花稅，原意係懲罰炒家，打擊炒風，但實際上隨時變成懲罰真正嘅用家，你話係咪戇居吖。
運輸及房屋局局長鄭汝樺話喎，額外印花稅由買賣雙方共同承擔，比例就由雙方自行協商。之不過，法例冇規定，叫買賣雙方根據乜嘢協商呀？咁咪即係製造爭拗，引起矛盾。按本港樓宇買賣慣例，印花稅一般由買家負擔，即係話，用家日後可能要幫炒家支付部分甚至全部額外印花稅。叮，黑狗偷食，白狗當災，呢啲究竟係乜嘢邏輯呀！
舉個例講，打工皇帝納多啲稅，本來係天經地義，但如果有朝一日港府突然修例，規定其他打工仔要幫打工皇帝支付稅款，係咪好荒謬呀！
其實，正如立法會議員話齋，要解決呢個問題並唔難，只要透過簡單修例，就可以規定炒家支付額外印花稅。問題係，政府連咁簡單嘅事都唔肯做，卒之搞到用家受株連，簡直係本末倒置。難怪政府被人鬧「懶到出汁，唔經大腦」，真係冇鬧錯！
仲有吖，當局規定徵收額外印花稅生效日期，按簽署正式買賣合約日期計算，咁即係話，就算喺公布措施前一晚簽署咗臨時合約，如果喺兩年內轉售物業，買家亦要支付額外印花稅。咁搞法，等於否定臨時合約嘅法律地位，唔怪得有法律界學者直斥港府嘅做法絕對唔妥當，完全唔公平，隨時引起法律爭拗。
港府壓抑樓市前怕狼後怕虎，不嬲都係小打小鬧，今次忽然轉性出辣招，本來已經唔係好正常，點知仲係未經深思熟慮嘅急就章，簡直係添煩添亂。太一叮奉勸各位高官，唔該你哋用個腦諗吓，諗清楚先至出招，唔係嘅話，難保唔會重演「八萬五」嘅悲劇。叮佢個鎯鎯！
