保育矯枉過正 官府與民爭地

政府成日話保育呢樣、活化嗰樣，實情連保育為乜都唔清楚。應做唔去做，市民想保留嘅照拆可也，畀人炳得多索性亂保一通，連唔關事嘅村地都唔放過。

呢嗱，沙頭角東面有條鎖羅盆村，周邊係船灣郊野公園。由於漁、農業式微，人口不斷外移，已經冇人住。幾年前部分村民為咗方便日後返嚟祭祖掃墓，或者得閒聚吓腳，打算恢復番鎖羅盆村。

活化鄉村亦係保育一部分，不過村民估都估唔到，政府唔該都冇聲已經搶先將屬於鎖羅盆村嘅五幅土地「充公」，納入郊野公園範圍。村民擔心，第日村內就算做啲基本工程都會遇到諸多障礙，復村好夢成空。

叮！保育自然環境冇人反對，但係保還保，搞到與民爭地，擾民不止，係本末倒置、適得其反。點解政府要咁搞？記得嗎，前排西貢大浪西灣天然美景畀人破壞，「香港後花園」變咗瘌痢頭，海下灣又畀地產商睇中，事先張揚會搞開發。兩單嘢連環爆，發現仲有更瘀嘅，原來本港有五十三幅鄰近郊野公園嘅土地冇任何圖則保護。保護環境失職，港府畀人鬧到飛起，慌唔係想快快趣趣補鑊，有理冇理先將包括鎖羅盆村在內嘅幾條村劃做郊野公園至算咩。

既然劃錯咗，唔該拿拿臨改番正啦，點知又係一筆糊塗帳。村民去地政總署查，署方話地圖係就係佢哋繪製嘅，至於鎖羅盆村村界點樣劃分，唔關佢哋事，由其他部門負責。既然係咁，搵負責審批用地草圖嘅規劃署冇死嘞啩？

誰知規劃署嘅回應講咗等於冇講，話佢哋只係將郊野公園唔包括嘅土地勾畫出鎖羅盆村嘅範圍。至於有冇錯劃，規劃署同漁農自然護理署只係話，做土地詳細規劃用途嗰陣，會參考居民嘅意見。個波踢嚟踢去，冇一個部門講得出問題出喺邊度，更加冇人肯負上責任。

唉，政府搞保育一向得把口，綠水青山保唔住，歷史古蹟一樣難逃厄運。港島半山大宅景賢里畀人拆到甩皮甩骨，當局先至急急腳列為暫定古蹟；一代武打巨星李小龍嘅故居淪為時鐘酒店，業主要主動出錢出地支持活化；孫中山戰友故居竟然變成蝙蝠竇；早就列為考古遺址嘅大浪西灣，前排有人大興土木，古蹟辦居然唔知發生乜嘢事。

保育矯枉過正，官府與民爭地，本港保育同其他地區比較，輸足九條街，政府既冇提供足夠資源，又冇長遠規劃，見步行步，唔踢唔郁。唉，等呢班官老爺有心搞保育，直頭蚊都瞓，蛇都死啦，仲復乜鬼村，活乜鬼化吖。叮！