愛心基金育幼苗　太陽溫暖照萬家

青少年好似幼苗，要有合適嘅土壤同埋悉心嘅灌溉，至可以茁壯成長，成為社會棟樑。之但係，人生際遇個個唔同，對於家境清貧嘅青少年嚟講，最緊要有機會接受教育，才可望擺脫跨代貧窮嘅命運。

好彩，東方紅，太陽升，有太陽就有溫暖，有溫暖就有希望。太陽報愛心基金一直以青少年為主要服務對象，分別喺學業、醫療及經濟上提供協助，由九九年成立至今，合共籌得超過二千萬元，累積受惠人次多達十三萬，善長鼎力支持，功德無量！

正所謂，知識改變命運，書本就係改變命運嘅鎖匙。為咗幫助貧困學生接受教育，改變命運，太陽報愛心基金連續十一年舉辦「心之書」贈書計劃，歷年獲贈全套開學課本嘅學生超過二千三百人，計劃總支出已超過三百七十七萬元。受資助者全部係品學兼優但家境清貧嘅中小學生，部分已經「拔尖」升上大學，即將投身社會，成為香港未來嘅希望。

仲有呀，太陽報愛心基金同東方日報慈善基金合辦社工系學生助學計劃，多年來撥出八百一十萬元善款，協助近八百名社工系貧窮學生完成學業，至今已有好多受惠學生投身社工行列，傳播愛心種子，幫助更多有需要嘅人。

除咗贈書助學，太陽報愛心基金仲幫助清貧學童達成夢想。有位來自綜援家庭嘅八歲小妹妹泳琳，一直希望擁有一部電腦，以便可以做功課，鑑於泳琳學習成績優異，舊年考到全班第一，愛心基金知道後送咗一部全新電腦畀佢，令佢夢想成真。泳琳保證，「我會畀心機讀書，第時有機會幫番人」。見到一位八歲小妹妹咁生性，善長仁翁都替佢高興。

為善最樂，不甘後人。同太陽報愛心基金一樣，東方日報慈善基金亦得到善長踴躍支持，基金成立至今廿五年，已經得到六十七萬人次捐款，合共籌得四億五千九百幾萬善款，先後幫助一百二十五萬人次。

太陽報愛心基金以扶持幼苗培植棟樑為主，東方日報慈善基金則以救急扶危為己任，向受難者伸出援手，為病危者尋找生機。○四年，有位患腦幹腫瘤嘅兩歲小朋友明仔，被本港醫生診斷為只剩下大約半年命，後來明仔家人知道澳洲有間醫院可以做呢種手術，但總共需要五十萬元先至可以成行。咁就難倒明仔家人喇，對於一個基層家庭嚟講，去邊度籌咁大筆錢呢？《東方日報》知道情況後登高一呼，應者雲集，火速籌足款項，幫助明仔赴澳洲接受手術，重獲新生。

至於最近嘅例子，相信大家仲記得患先天性單邊肺部發育不全綜合症嘅女嬰茵茵，因為本港欠缺呢類治療技術，又無力籌措四十萬元赴台灣治療，命懸一線。太陽報愛心基金同東方日報慈善基金及時伸出援手，迅速籌獲善款一百八十幾萬元，資助茵茵赴台北成功接受手術，並於一歲生日前夕康復出院。

事實證明，香港人愛心爆棚，樂於助人，太陽報愛心基金同東方日報慈善基金嘅豐碩成果，就係人間有愛嘅最佳例子。值得一提嘅係，兩個基金嘅行政同經常性開支全部由東方報業集團捐出，確保善長嘅每一分、每一毫捐款都可以用喺受助人身上。太一叮相信，只要港人繼續發揮愛心，太陽報愛心基金同東方日報慈善基金必定可以幫助更多人！