光玩數據不作為 港府一味等運到

港府下個禮拜將公布三條過海隧道分流研究報告，據講當局傾向「紅加東減」方案，唔同意回購西隧喎。

所謂紅加東減，簡單嚟講就係紅隧加價，東隧減價，將紅隧嘅部分車輛分流去東隧，解決紅隧長期擠塞問題。呢條橋聽落好似有啲諗頭，但到頭來睇怕又係一廂情願。有人計過數，如果行開紅隧嘅車輛改行東隧，要多行四公里，依家油價咁貴，淨係油錢都襟計喇；再講，無喇喇要行開紅隧嘅車輛畀多啲錢，盞引起另一場爭議嘅啫。

其實，民意一邊倒認為回購東、西隧，先至可以平衡三條隧道嘅車流量，徹底解決塞車問題。可惜當局硬係唔肯聽，一味玩數字遊戲。運輸署話喎，西隧往港島出口已經非常擠塞，難以承受新增車流量，所以喺中環灣仔繞道啟用之前，西隧根本冇可能為紅隧分流咁話。

運輸署掟咗一大堆數字，例如話朝早繁忙時段，西隧接駁路段有九千架次車輛，早就形成樽頸，如果西隧再增加三百至五百架次，車龍就會排到西隧港島出口。運輸署咁樣玩數字遊戲，無非想證明，回購西隧唔可以改善交通擠塞狀況。

叮！班官僚其實係擘大眼講大話，係人都知西隧不嬲車流疏落，而西隧嘅接駁路段冇錯係好擠塞，但以此為理由拒絕回購西隧，簡直係本末倒置。

有立法會議員就講得啱嘞，政府當年一味諗住起隧道，忽略接駁路段嘅規劃，家陣又以接駁路段嘅數據來證明唔應該回購西隧，凸顯政府欠缺公信力。

根據運輸署嘅邏輯，豈不是仲要等到二○一七年中環灣仔繞道通車，先至可以解決港島塞車問題？大佬呀，中國人抗戰都係打咗八年啫，估唔到港府解決三隧分流問題仲要等多七年，簡直係天方夜譚！

講到尾，班高官不嬲懶到出汁，多做多錯，少做少錯，最好乜都唔使佢哋做。港府高官最叻就係守株待兔，希望有隻兔仔自己撞埋嚟，就算冇兔仔撞埋嚟，守吓守吓，好快就夠鐘咬長糧，關人個關。

太一叮硬係諗唔明，點解港府點都唔肯回購東、西隧？回購兩條隧道，係就係要用一大筆錢，不過唔好忘記噃，兩條隧道等於兩條大水喉，長開長有，年年都有一筆穩定可觀嘅進帳，根本係有賺冇蝕，何樂而不為？叮！