台灣嚴懲淫媒 香港姑息養奸

壹淫媒宣淫販賤，荼毒青少年，將香港搞到烏煙瘴氣，最近更發展到網上宣淫添，簡直係人神共憤。

話說壹淫媒旗下網站以「如何自行檢查乳房」為名，播放一套女子裸露胸部短片，四分鐘片段全程冇打格仔，包括乳房大特寫，仲有搓揉按壓乳房鏡頭，卒之被淫審處評為二類不雅物品。最奇嘅係，短片播放前嘅警告字眼變來變去，開頭話「本片內容純為醫學用途，檢查過程包含裸露鏡頭」，等到淫審處將短片評定為不雅物品之後，有關警告字眼並冇即時修改，直到畀本報踢爆，先至修改。係人都睇得出，壹淫媒根本係掛羊頭賣狗肉，以醫學用途為名，宣淫販賤為實。

但奇怪嘅係，影視處居然又玩放生，喺相關網站修改警告字眼之後，表明唔再採取任何檢控行動。

影視處話喎，由於相關網站嘅負責人已經為呢段短片加上適當警告字句，所以該處不擬採取進一步行動。咁都得？正如資深大律師陸偉雄話齋，「冇理由個人打咗劫，之後認錯，畀番啲錢人就可以當冇事」。

更離譜嘅係，影視處今次放生壹淫媒，並冇徵詢過律政司意見，即係自把自為咁話。身兼淫審處審裁員嘅執業大律師龔靜儀就質疑得啱嘞：「點解影視處有法例唔跟，要跟啲冇法律效力嘅業務指引？」叮！係人都知散播不雅物品係刑事罪，影視處以權代法，隨意放生淫媒，視法律如無物，根本同幫兇冇乜分別！

影視處放生壹淫媒，其實都唔使大驚小怪。根據《淫褻及不雅物品管制條例》，凡係發布不雅物品，一經定罪，初犯者最高可判罰款四十萬元及監禁一年，再犯者最高可判罰八十萬元及監禁一年。但咁多年來，壹淫媒累積違反法例已經一百一十六次，從來冇人被判坐監，就算罰款亦只係象徵式罰一萬幾千，不痛不癢。仲有吖，壹淫媒曾以各種理由拖延旗下刊物十九宗涉及發布不雅物品嘅審訊，令案件纏擾多年，最後只有十二宗被定罪，亦只係輕輕罰款了事。今次壹淫媒網上宣淫，影視處連檢控都慳番添。

一次係咁，兩次係咁，百幾次都係咁，港府百擒百縱，樂此不疲，所謂處罰已被壹淫媒視為營運成本，冇關痛癢，唔單止毫冇阻嚇作用，甚至令淫賤黎更加肆無忌憚。佢禍害香港嫌唔夠，仲將魔爪伸向台灣添。呢，台灣爛果報旗下「動新聞」宣淫揚暴，早排被台北市政府合共罰款一百萬元新台幣，雖然壹淫媒上訴，最後仍被台北高等行政法院裁定敗訴。

台灣當局執正嚟做，違法必究，執法必嚴，淫賤傳媒淪為過街老鼠，人人喊打。睇番香港，當局姑息養奸，包庇縱容，壹淫媒橫行無忌，愈淫賤愈快樂。請問港英餘孽，究竟仲要包庇淫賤黎到幾時？叮佢個鎯鎯！