污泥焚化遲到 垃圾焚化無期

污泥處理設施講咗多年，港府終於交功課嘞，斥資約五十億嘅屯門曾咀污泥焚化廠工程尋日宣布展開，預計二○一三年完工，建成後每日可以處理最多二千噸污泥。

近排連衰幾鑊嘅環境局局長邱騰華出席簽約儀式嗰陣不知幾風騷，唔使搽「面懵膏」，即時扮「環保先鋒」認屎認屁。吹完歐盟焚化技術標準、污泥焚燒溫度、再生能源利用都未夠癮，連焚化廠大樓設計，入面嘅水療中心，旁邊嘅濕地公園都噏一大餐。

邱騰華話，污泥焚化處理後體積會減少九成，唔單止可以減輕堆填區壓力，仲能夠紓緩污泥臭味，又話本港唔能夠單靠堆填區處理廢物，希望焚化廠可以起示範作用喎。

叮！唔該咪再扮嘢啦！污泥焚化呢份功課，港府已經遲交咗好耐。○七年環保署已經計劃喺屯門興建首個污泥處理設施，結果拖咗三年幾至同承建商簽合同，再過多三年至投入使用，堆填區附近居民仲要捱多三年惡臭，試問當局有乜咁值得大吹大擂？

邱騰華講到口水花亂噴，好似廢物處理勝券在握咁款，唔知係健忘定係詐傻扮懵，佢一個字都冇提焚化之後嘅污泥點處理。查實，全港污泥集中喺曾咀焚化廠處理之後，剩低嘅灰一樣要運去堆填區。

叮！污泥焚化後體積大幅縮細，但每日仲有數以百噸污泥灰倒番落堆填區。亦即係話，堆填區塞到爆嘅風險一啲都冇減少，只不過遲幾年至殺到啫，香港遲早通街垃圾。

話時話，港府口口聲聲唔能夠單靠堆填區處理廢物，除咗呢個「遲來的」污泥焚化廠外，仲做過啲乜？目前嘅堆填區過多幾年將全部飽和，當局五年前提出興建「綜合廢物管理設施」，包括焚化爐、有機廢物處理設施、污泥處理廠等，冇一項如期開波，尤其係垃圾焚化爐，更加連影都未見。

講起真係火都嚟埋。垃圾焚化技術近年突飛猛進，唔少發達國家同地區早已經利用焚化爐處理廢物，有啲甚至八成垃圾透過焚化處理。港府則因為少做少錯嘅官僚作風，加上等收工嘅夕陽政府心態，垃圾焚化爐到呢一刻仲係冇聲氣。

更弊嘅係，港府自己黔驢技窮，但市民嘅好橋統統聽唔入耳。呢，本港有專家建議參考海外經驗，按立法會選區劃分，五區各建一個焚化爐；青洲英坭四年前就提出結合水泥生產同燃燒垃圾嘅「環保廢物熔化系統」，效率高成本低，呢啲建議當局點解唔考慮呢？

污泥焚化遲到，垃圾焚化無期。借用巴士阿叔金句，問題完全「未解決」。計太一叮話齋，堆填區就快爆滿，焚化爐泥牛入海，未來幾年勢必出現垃圾處理「空窗期」，香港遲早變成「垃圾之都」。