領匯發財唔立品 殘障人士慘遭殃

近排香港最熱門嘅話題係「發財立品」。傳媒成日都喺度討論，有大學仲將「企業社會責任」同「商業道德」列做必修課程，要學生學識「未發財，先立品」。

新一份施政報告食住條水上，呼籲有錢佬捐錢成立關愛基金照顧有需要人士，商界紛紛解囊相助，睇嚟香港多數商界人士仲係有社會責任感嘅。之不過，亦有人為咗賺錢，可以既無良又冇品，領匯就係典型嘅畸士。

比如講，香港法例規定，公共場所要設置無障礙設施，為殘障人士提供方便。作為品行良好、遵紀守法嘅商戶，絕對會按法例辦事。咁領匯又點做呢？平機會幾個月前發表調查報告，踢爆領匯轄下多處公共場所嘅無障礙通道未如理想，要求從速改善。風頭火勢之下，領匯死死氣應承盡快採取措施。

其實，領匯只係應承住先㗎咋，呢啲冇錢賺嘅事，佢哋點會急呀。果然，有政黨對領匯管理嘅百幾個商場做咗調查，發現領匯商場嘅狀況根本冇改善。

調查報告直斥領匯商場較少考慮失明人士嘅需要。大凡失明人士入商場，搭上落唔同嘅樓層，都靠內嘅語音系統報告層數，又或者靠觸摸內嘅觸覺點字符號，先至知道到咗邊一層，但係佢哋一入領匯嘅商場就弊傢伙咯，事關呢啲商場有六成冇語音系統，又有半成冇觸覺點字符號標牌，另外，有五成九商場無盲人引路徑，失明人士直情寸步難行。

使用輪椅人士問題更大，因為三成七嘅領匯商場冇喺所有出入口設下斜通道，輪椅人士要兜路行先至可以入商場。如果人有三急就更弊，有十幾個領匯商場根本冇設輪椅人士專用洗手間，其餘多間商場話就話有專用洗手間，但都要上落樓梯，或者推開防煙門，先至可以入去，簡直形同虛設。一句講晒，對於殘障人士，領匯商場遍布陷阱，一唔小心就中招，甚至連命都冇埋。領匯咁搞法，直情係靠害。

叮！領匯年年賺十幾廿億，仲一味狂加租，撈到盆滿缽滿，但攞少少錢出嚟改善對殘障人士嘅服務就牙痛咁聲，咁咪就係發財唔立品囉。調查結果公布以後，平機會話會搵領匯傾吓，催佢哋快啲改善喎。嘥氣啦，到時又咪批評接受，態度照舊。

家陣好多商界人士都抱怨社會上出現仇商情緒。其實毛伯伯生前講過，世界上沒有無緣無故嘅愛，亦沒有無緣無故嘅恨。仇商情緒唔係天上跌落嚟㗎，如果所有商戶都好似領匯咁冇品，市民點會唔仇商呀？叮佢個鎯鎯！