旅業四面受敵 遲早坐食山空

上海迪士尼樂園日前正式簽約，六年後落成，呢隻等於香港迪士尼樂園三倍大嘅米奇老鼠來勢洶洶，對香港究竟有乜嘢影響，影響又有幾大呢？

香港迪士尼樂園行政總裁金民豪話喎，上海迪士尼同香港位置唔同，一個喺長三角，一個喺珠三角，客源唔同，唔會有直接影響。係唔係o架？

其實，如果話上海迪士尼對香港冇影響，三歲細路仔都唔信喇，計太一叮話齋，影響一定有，問題係幾大啫。香港迪士尼樂園係全球最袖珍嘅，就算依家正擴建緊，將會增加三個主題園區，有啲遊戲項目仲係香港獨有嘅添，但就算日後擴建完成，仍然同上海迪士尼樂園冇得揮，你話有冇影響吖？

本來呢，有競爭先至有進步，對於香港嚟講，上海興建迪士尼樂園未必完全係壞事，關鍵係香港本身有冇危機意識，以及點樣應對。如果港府識得發憤圖強，將壓力化為動力，將危機變成機會，盡快改善旅遊設施，積極推動旅業發展，咪可以壞事變好事囉；相反，如果港府故步自封，一成不變，咁就唔止有影響，隨時瓜得添。

太一叮絕對唔係危言聳聽，事關香港嘅競爭對手唔止上海，直情係四面受敵，四面楚歌。就以新加坡嚟講，自從聖淘沙環球影城年初開幕後，吸引大量旅客，除咗旅遊業受惠，仲帶起整體經濟。人哋話到明，目標就係吸引中國及香港旅客。

仲有呀，一直被香港視為小弟弟嘅澳門，近年亦積極發展旅遊業，威尼斯人度假村嘅規模大家已經見識過，最近又有財團計劃斥資過百億，興建佔地二十萬平方米嘅大型主題公園同酒店項目，設施包括室內沙灘及衝浪池、４Ｄ電影院及馬術表演場等等，預料每年可額外為澳門帶來二百五十萬旅客。唔使講，到時香港旅遊業又多一個勁敵。

人哋一日千里，香港又點呢？叮，面對重重包圍，港府淨係識得吹水，一時話「無懼競爭」，一時又話「影響不大」。咁多年嚟，本港旅遊業主要靠食老本，基本上冇推出新景點，漁人碼頭無疾而終、大澳東方威尼斯得個噏字、郵輪碼頭仲要幾年先至落成。硬件唔掂，軟件亦係問題多多，周不時爆出宰客、趕客醜聞，臭名遠播，乜架都丟晒。

唔怪得日前有項「理想移居地」嘅國際性調查顯示，香港喺亞洲只排第四位，遠遠落後於新加坡，連日本及南韓都比唔上。講真吖，香港再唔改善，唔單止好難吸引到人才移居，遲早連旅客都敬而遠之。叮！