高官只識出口術 任由樓市泡沫化

有位藝人早幾年做棟篤笑，話自己住五百呎嘅豪宅，令觀眾笑到趴喺度。勢估唔到，當日嘅笑話今日竟然成真，連四圍都係工業大廈、面積只有五、六百呎嘅單位都夠膽死叫做豪宅，有啲仲係超級豪宅添。

點解叫做豪宅呀？價錢夠豪吖嘛！近期樓市炒風熾熱，樓價節節上升，連豆腐膶咁細嘅單位都賣豪宅價，閒閒地過萬蚊一呎。普通打工仔冇能力買得起，惟有望樓興嘆。更令人擔心嘅係，美國聯邦儲備局已經決定繼續大印銀紙，香港樓市炒風一定會進一步升溫。

炒樓風愈吹愈勁，政府束手無策，惟有由一班高官出口術。金融管理局總裁陳德霖尋日話喎，現時全球金融環境好唔正常，亦冇可能長期維持，必然會出現調整，到時一定會有震盪，呼籲市民做好準備。佢仲為政府嘅無能辯護，話政府會喺適當時候推出新招。

港府高官不嬲吹水唔抹嘴，呢種大話已重複過好多次。財政司司長曾俊華較早前都係威係勢咁警告炒家，要佢哋唔好當政府冇到，話政府會喺有需要嘅時候推出措施，確保樓市平穩發展咁話。

班高官可能當正自己係神話裏面嗰啲高人，唸幾句咒語就可以令狂風暴雨平息。可惜佢哋唔係神仙，樓市炒風反而愈吹愈勁。難怪有立法會議員直斥政府嘅「溫馨提示」係上演一場狼來了遊戲，仲踢爆曾俊華喺過去一年已經警告咗炒家十一次，成日都話再炒就有風險，講到第三次已經冇人信，第十一次更加冇人信啦！

至於陳德霖等人所講嘅進一步措施，更係得啖笑。政府過去一年的而且確推出過一啲招數，例如不定期賣地、禁止樓花摸貨、收緊非自住物業按揭成數等等，施政報告又提出每年提供興建二萬個私人住宅單位嘅用地，以及取消購買物業作內地人士投資移民嘅安排。但呢啲花拳繡腿對炒風完全冇阻嚇作用，亦無法令市民增加對政府嘅信心。

因乜事會咁嘅呢？其實一字咁淺，無論係炒家定係市民，都睇死政府冇即時增加土地供應嘅決心，所以無論推幾多措施都係煲冇米粥。

有人仲直斥政府無意打擊高樓價。講得啱！呢班官僚不嬲係少件事好過多件事，認為多做多錯，少做少錯，唔做冇錯，打擊炒風只係做吓騷，其實佢哋係等運到，以為等到美國加息，樓價自然調整，就一天都光晒。

高官懶懶閒，樓市更加泡沫化，所以投資者一定要醒醒定定，睇清形勢，否則樓市一冧，就會淪為負資產業主，到時真係欲哭無淚咯。叮佢個鎯鎯！