菲國政府專搵笨　莫讓港人做老襯

香港人對邊個國家最反感？好多人以為答案一定係日本，日本軍國主義當年發動侵華戰爭，欠下纍纍血債，今日又喺釣魚島搞出撞船風波，舊恨未了又添新仇。愛國心爆棚嘅香港人對日本反感係好正常嘅。

不過，原來有個國家比日本更令香港人反感。一項民意調查顯示，幾乎冇香港人對菲律賓政府有好感，表示反感嘅就高達八成，而對日本反感嘅受訪者就只有五成。

其實都唔使大驚小怪，當日幾百萬香港市民都坐喺電視機前，目睹香港旅行團喺馬尼拉被屠殺嘅慘劇，菲國廢柴警察束手無策，進退失據，令香港團友枉死喺兇徒嘅槍下，是可忍孰不可忍！

香港人更唔會忘記菲國總統喺記者會笑口噬噬嘅醜態。佢居然話冇人可以保證人質一定成功獲救，仲話當年莫斯科歌劇院脅持人質事件都死咗好多人啦。人哋開開心心嚟你個國家旅行，卒之客死異鄉，你仲講風涼話，過唔過分啲呀！

菲律賓政府事後嘅處理更係令人谷氣。調查報告避重就輕，對八名香港團友嘅死因始終講唔清楚。本來報告點咗幾個高官嘅名建議檢控，點知總統大人大筆一揮全部放生，冇人要為營救失敗負責。唔通香港團友係抵死嘅？香港人睇到咁嘅結果，有乜法子對菲律賓有好感，叮！

本來香港市民不嬲對菲律賓人民友好。有十幾萬菲傭喺香港打工，為港人打理家務，照顧細路，令佢哋無後顧之憂，實在功不可沒，同時又賺取大量外匯，貢獻菲律賓經濟發展，直情係一家便宜兩家着。

本來相安無事，點知菲律賓政府唔知抽起邊條筋，忽然推出「強制性外勞保險計劃」，要求菲傭購買咗勞工保險先可申辦出境手續，保費由海外僱主或中介公司承擔。眾所周知，香港僱主一向都有為菲傭購買保險，依家菲律賓當局一刀切強制購買勞保，等於要人哋支付雙重保費！大佬，搶咩！

嗱，家陣好清楚嘞，菲律賓政府起勢搵笨，令香港人對菲律賓冇晒好感。不過咁，淨係市民知道原因係唔夠嘅，最緊要係香港政府唔好再對菲國政府抱任何幻想，唔好令香港市民做老襯。

先講人質事件，靠菲律賓政府查係唔會有結果嘅，香港警方既然已經介入調查，就要查個水落石出，還死難香港團友一個公道。至於購買雙重保費咯喎，咁搵笨嘅事千祈唔可以應承，最多咪一拍兩散，用越傭、泰傭代替菲傭。叮！

正所謂民意不可侮，港府應該令菲律賓當局知道，香港人唔係咁好蝦嘅，如果佢哋唔想見到十萬菲傭大回流，就好好檢討啦！