污染指數爆燈 減排雷大雨小

成績差嘅學生最怕乜嘢？唔使講，梗係最怕派成績表喇，睇見人哋科科攞A，自己就科科肥佬，真係學孔夫子話齋，「吾不欲觀之矣」！

呢種心態，環境局局長邱騰華一定好了解，事關佢就係一個科科肥佬嘅學生。呢，啱啱公布嘅粵港珠三角空氣監測數據又肥佬喇，今年上半年本港全部三個監測站都錄得空氣質素最差嘅「等級五」，係三年幾以來首次，其中兩個觀測站嘅二氧化氮超標時數仲勁增幾倍添。呢張滿江紅嘅成績表直情摑咗邱騰華一巴。

話時話，自○七年起，本港三個監測站從來未錄得如此不堪入目嘅指數，港府成日吹水話要改善空氣質素，點解愈改愈差㗎？

冇錯，本港上半年曾受內地沙塵暴影響，空氣污染指數試過爆燈，今次污染數據超標唔排除與此有關。不過，沙塵暴只係偶然出現，本港空氣污染指數長期超標，講到底都係自己嘅事。正如環保團體話齋，當局控制車輛及電廠廢氣排放不力，先至係空氣質素下降嘅主因，邱騰華責無旁貸。

係人都知，本港空氣污染物主要來自兩方面，一係汽車，二係電廠，如果政府真係想改善空氣質素，就要針對呢兩個污染源大刀闊斧採取措施。之但係，成班高官淨係識得做騷，有姿勢冇實際，雷聲大雨點小，又點可能改善空氣呀。例如所謂停車熄匙就係最添煩添亂嘅例子，大熱天時要求司機熄咗冷氣等客喎，直情焗桑拿咁焗，你話係咪靠害吖。

呢嗱，新一份施政報告又提出所謂優質生活，聲稱要多使用清潔低碳嘅能源及燃料發電，包括用天然氣同核能取代燃煤發電，用混合動力巴士取代柴油巴士，以及喺旺角、銅鑼灣等鬧市設置低排放試點區，只准低排放巴士進入咁話。

呢啲措施唔係唔好，但做唔做到根本冇人知，港府姑妄言之，大家姑妄聽之，千祈唔好當真。比如講，按政府規劃，日後發電燃料五成將來自核能，問題係核能發電係咪真係有助環保，好多人仲爭議緊。再講啦，大量用核能發電，安全問題亦令人擔心，早排大亞灣核電廠發生洩漏事故，已經搞到人心惶惶。

仲有，當局話要淘汰現時嘅歐盟二、三期巴士，用歐盟四期巴士代替，之但係，巴士公司又唔係政府開嘅，佢哋慢慢換車，政府都吹佢哋唔脹喇。

退一步講，就算巴士公司肯加快更換巴士，但羊毛出在羊身上，最終咪又係要大幅加票價，搵市民嚟搞。講到底，想改善空氣質素，一定要政府同市民一齊承擔、共同付出先至得，好似當局咁一味諗縮數，口爽荷包立，搞嚟搞去梗係得個吉喇。叮！