孤寒政府又縮骨 交通津貼變綜援

做打工仔難，做香港打工仔更難，做現時嘅香港打工仔難上加難。想知道香港打工仔嘅辛酸，聽吓歌神許冠傑嗰隻《半斤八両》就知嘞：我哋呢班打工仔，通街走趯直頭係壞腸胃，搵嗰些少到月底點夠使，奀過鬼……

因乜事話現時嘅香港打工仔難上加難呢？其實唔使講都明啦，低下層打工仔嘅薪水本來就得雞碎咁多，未到月底已經唔夠使。家陣衣食住行都貴到飛起，惟有死慳爛慳，不過喎，餸可以食少啲，新衫可以着少兩件，但係交通費就難慳嘞，交通工具樣樣都加價，點慳呀！最慘嘅係嗰啲跨區打工仔，交通費閒閒地過千元一個月，一出門口份糧就冇咗一橛。好多人頂唔順，惟有唔撈。

有見及此，新一份施政報告提出「鼓勵就業交通津貼計劃」，津貼低收入在職人士每人每月六百蚊。計劃一公布，好多打工仔拍爛手掌，仲以為班高官轉咗性，終於做番件好事益市民添，點知原來係搵笨。

原來魔鬼喺細節當中，本來施政報告講到明，呢六百蚊係用嚟津貼「低收入在職人士」嘅，即係只要月入唔夠六千五百蚊就有資格申請。但係勢估唔到，政府居然偷龍轉鳳，將受惠人士改成「低收入家庭中嘅在職人士」。

咁即係點呀？係咁嘅，無論你人工幾低，如果你全家嘅資產超過限額，都唔使旨意申請交通津貼。嘩！大鑊咯，連好多攞開交通津貼嘅人都會冇得攞。政府將鼓勵就業交通津貼變咗綜援，今日嘅我打倒昨日嘅我，仲有乜誠信可言？

其實，政府孤寒成性玩縮骨，都唔係第一次啦，大家唔會唔記得，當日連增加長者生果金都話要入息審查，搞到議事堂六月飛蕉，家陣又打交通津貼嘅主意，班高官唔通真係唔識死？叮！

講起生果金，太一叮忍唔住要數多政府一筆。政府硬係唔肯撤銷離港限制，令返內地度晚年嘅長者冇得攞生果金而被迫回流香港，淨係今年就有八十個長者返咗嚟。嗱，八十二歲嘅伍伯本來喺內地生活，可惜積蓄用晒，惟有返香港，佢冇親冇戚，入住政府買位嘅老人院，不知幾孤獨。如果政府取消生果金離港限制，呢啲老人家就可以喺內地安享晚年，唔怪之得有勞工界人士狠批政府僵化，令長者臨老奔波。

你話香港打工仔係咪好慘呢？做得嘅時候為三餐奔波，想話攞少少交通津貼，都要查家宅，臨老想返內地安享晚年，班官僚又阻頭阻勢，嗰種辛苦折墮真係講出嚇鬼，死畀你睇，咪話無乜所謂。叮！