廢料回收交白卷 環保不力反卸責

環境污染禍及子孫後代，廢物處理宜緊不宜鬆，如果唔係就會後患無窮。到出咗事至諗計應對，一切可能已經太遲，做幾多嘢都於事無補。

消委會研究結果顯示，測試嘅八款一次性使用碳性電池入面，部分樣本水銀同鎘含量雙雙超過歐盟環保標準。本港呢類電池使用相當普遍，隨便棄置亦十分嚴重，有立法會議員促請港府實施回收制度。

環境局局長邱騰華尋日書面回應，仲以為呢位近排負面新聞爆燈嘅問責局長會做番齣好戲，點知再次令人失望。水銀同鎘會對人體構成好大傷害，原來當局根本冇法例規管一次性電池嘅重金屬含量，回收制度更加提都唔使提。

叮！唔講都唔知，齋睇港府數字，過去五年棄置喺堆填區嘅一次性電池多達一萬六千六百幾公噸，就算只係好小一部分洩漏水銀同鎘，長期積聚隨時可能引發生態災難。

環保大漏洞咁明顯，邱騰華嘅回應簡直係混帳，佢話當局做過毒性滲濾測試，冇發現重金屬含量超標問題。至於回收及處理安排，全球好多地方都冇，而且回收成本較高，再循環價值有限，所以暫時冇呢方面打算。

按當局嘅講法，即係冇着數就唔做，其他地方冇，香港就唔需要有。叮！樣樣跟人尾，家陣全世界冇一個地方好似香港咁，連郊野公園都攞嚟做堆填區，又唔見港府學吓人哋？

一次性電池唔肯回收，咁當局○五年開始同業界推行嘅「充電池回收計劃」又搞成點，有乜成果呀？原來五年來回收嘅充電池有二百一十四公噸，約一百萬粒，即係一年廿萬粒咁大把，一日收得嗰五百幾粒。當局話已經喺全港設立咗五百幾個回收點，計落每個點平均一日只收一粒。咁嘅回收計劃，直頭得啖笑啦！

叮！講開又講，呢類回收計劃使咗唔少公帑，環保效益成疑。好似電腦及電子產品回收計劃咁，回收站同流動收集車本來就唔足夠，當局又懶得宣傳，服務仲要限時限地提供，回收率長期偏低，市民就算有心環保，都因為太麻煩而被迫放棄。

港府除咗電子廢料回收交白卷，都市固體廢料處理同樣唔掂，前一排嘅堆填區風波就係樣辦。尋日邱騰華回應立法會議員質詢嗰陣，居然玩卸膊，諷刺反對聲音係單純從政治或選票出發，公然將遲遲未建焚化爐嘅責任，歸咎於政黨同地區人士。

應回收嘅廢料唔收，已推出嘅計劃又爛尾，死唔認衰不特止，仲要諉過於人。邱騰華搞環保，一係乜鬼都唔做，一係做到一塌糊塗。計太一叮話齋，靠廢物去回收廢物，咁嘅結果預咗啦！