焚化爐物非所值 邱騰華亂擲公帑

萬聖節當前，通街嘩鬼，氣氛熱鬧。咦，乜有隻妖怪往年從未出現過，但望落又似曾相識嘅？睇多眼，原來有環保人士扮成近排黑仔指數爆燈嘅環境局局長邱騰華，抗議佢打劫納稅人。

有環保組織踢爆，港府為減低堆填區負荷同減少臭味，斥資約五十億元喺屯門曾咀興建嘅污泥焚化爐，原來物非所值。調查仲發現，多數市民都支持用焚化爐處理垃圾，當局一拖再拖歎慢板，簡直同民意脫節。

點解環保人士咁扯火？梗係啦，唔使十億就搞掂、可以一了百了嘅方案，邱騰華唔揀，偏偏使多四十億興建一座只能治標、不能治本嘅污泥焚化爐。冥頑不靈，擇惡固執，你話係咪抵鬧吖？

據環保組織講，青洲英坭十年前開始研究香港嘅廢物處理問題，並且喺○五年試驗「環保廢物熔化系統」，將污泥脫水後形成嘅顆粒，取代進口煤用嚟生產水泥。有乜好處？嗱，除咗氣體排放量低於政府規定之外，二噁英排放量更少咗九成九，減排效果一流。最巴閉就係，系統成本只需九億五千萬元，只係曾咀污泥焚化爐造價五分之一，而且每日可以處理二千公噸脫水污泥，一啲都唔輸蝕。

唔怕唔識貨，最怕貨比貨。呢，就算買橙都要格吓價，揀又平又靚嘅買啦。興建咁重要嘅環保設施，政府居然唔格價，寧願買貴嘢。青洲英坭向環保署推薦呢個系統，署方舊年拒絕選用。理由除咗擔心地區反對聲音外，仲擔心成本太高喎。誰不知政府一個屈尾十，近日突然使多幾倍價錢，搵其他承辦商建焚化爐。唔理成本效益，買貴唔買平，唔怪得環保組織質疑當局有其他動機，要求交代選用承建商嘅準則。

查實，唔止污泥焚化爐係筆糊塗帳，邱騰華主導嘅環保政策樣樣無厘頭，都唔知想做乜。呢，膠袋稅直接入庫房，而唔係用於環保，似掠水多啲；派慳電膽券畀人鬧利益輸送，無疾而終；硬銷停車熄匙劣政惹起民怨，惟有樣樣豁免，虎頭蛇尾，名存實亡。

環保唔係靠做騷，一時一個新花樣，而係靠腳踏實地辦實事。環保組織調查發現，接近五成受訪者認為，焚化同源頭分類處理廢物有效；揀堆填區嘅唔到一成；更有五成六人認同，以堆填區處理廢物對環境更有害。但邱騰華偏偏該做唔做，連郊野公園都要夾硬變堆填區。

起焚化爐一拖再拖不特止，興建嗰陣仲亂擲公帑，捨優取劣做大花筒。計太一叮話齋，政府樣樣逆民意而行，唔怪得環保搞到一鑊泡咯。仲話「民心我心」，盡失民心就真！