強積金冇監冇管 打工仔任由宰割

好多人都話，美國人鍾意先使未來錢，香港人就鍾意儲錢養老，聽起來好似係讚緊香港人嘅節儉美德，其實恰恰反映香港人老無所養嘅慘況。美國有健全嘅退休保障制度，打工仔退休後，起碼三餐一宿唔使憂，香港就唔同，打工仔手停口停，如果冇儲蓄，臨尾嗰幾年都幾難過。

各界一直要求政府設立全民退休保障計劃，令打工仔退休後有生活保障。點知政府諗縮數，推出強制性公積金計劃，由僱主同僱員分別供款，政府就乜都唔出，咁樣一招，就將成隻鑊卸晒出去，問你服未？

無論點講都好啦，有咗強積金，打工仔退休後起碼有筆錢，好過仙都唔仙嘅。可惜政府唔監唔管，強積金問題多多，打工仔嘅血汗錢掟晒落鹹水海。

有工會趁強積金推行十周年，歷數強積金七宗罪，包括積金局打擊拖欠供款不力，對沖機制削減打工仔強積金存款，受託機構透明度低，行政費用高等等。

原來香港嘅無良僱主真係唔少，積金局今年頭九個月收到四千一百多單投訴，其中八成五投訴僱主拖欠供款。本來，法例規定僱主拖延供款係要受罰嘅，但係十年嚟，從來未有僱主因為拖欠供款而坐監，罰款亦係濕濕碎，拖欠二百萬強積金先至罰兩三萬咁大把，咁搞法，邊有阻嚇力㗎。

仲有，家陣好多僱主解僱員工時，都攞強積金供款嚟對沖遣散費，打工仔如果被炒過幾次，強積金就所剩無幾。如果撞啱僱主清盤，打工仔被拖欠嘅錢更永遠攞唔番。

另外，強積金受託機構行政收費昂貴，僱員供款無端端畀人作咗一大橛。加上僱員無權決定受託機構，惟有任人宰割。

大佬呀，僱員嘅供款負擔都唔小㗎，等同個個月九五折出糧。依家筆血汗錢愈嚟愈縮水，未到退休已經所剩無幾，叫人哋退休後點生活呀？

正如有學者話齋，政府唔可以翹埋雙手乜都唔做，應該立例嚴打拖欠供款嘅僱主，但係政府就好似借咗聾耳陳隻耳，乜都聽唔到。

更不堪嘅係，強積金制度搞到唔湯唔水，政府仲變本加厲，企圖推出「強醫金」，民意強烈反對，先至重新包裝，改名為自願醫保計劃推出諮詢。其實，所謂自願醫保計劃，同強積金一樣，都係肥咗保險公司，瘦咗市民。

講到尾，強積金只可以治標，設立全民退休保障計劃至係治本之道，可惜政府口爽荷包立，打死都唔肯做。難為班高官仲好意思講乜嘢民心我心、同舟共濟、繁榮共享添，真係吹水唔抹嘴，叮！